٥٠٥٥: فریابی نے سفیان سے اپنی سند کے ساتھ اسی طرح روایت نقل کی ہے اور امام طحاوی (رح) فرماتے ہیں ‘ ایک جماعت کا قول یہ ہے کہ کسی عورت اور بچے کو کسی حالت میں قتل کرنا جائز نہیں اور ان کے علاوہ لوگوں کو بھی قتل کا ارادہ کرنا درست نہیں جبکہ ان کے ضائع ہونے کا خطرہ ہو۔ مثلاً جب لڑنے والے لوگ جب اپنے بچوں کو ڈھال بنالیں اور مسلمان ان بچوں اور عورتوں پر تیر اندازی کے بغیر جنگجو لوگوں تک نہ پہنچا جاسکے تو ان پر تیراندازی حرام ہے اسی طرح اگر وہ قلعے میں بند ہوجائیں اور اس میں بچوں کو رکھیں تو اس قلعہ پر تیراندازی حرام ہے جبکہ یہ خطرہ ہو کہ یہ تیر ان عورتوں اور بچوں کو لگیں گے۔ انھوں نے مذکورہ بالا روایات کو اپنے استدلال میں پیش کیا۔ دوسروں نے کہا بچوں اور عورتوں کا قتل بلاشبہ درست نہیں مگر جب جنگجو لوگوں تک ان کو قتل کے بغیر نہ پہنچا جاسکتا ہو تو ان کا قتل اس وقت درست ہے ان کی دلیل مندرجہ ذیل روایات ہیں۔ فریق ثانی کا کہنا ہے کہ ان آثار کی صحت میں کلام نہیں۔ مگر ان کے سلسلہ میں ممانعت سے مراد بالقصد ان کا قتل کرنا ہے اور اس میں کسی کو اختلاف نہیں۔