٥٠٥٨: عبیداللہ بن عبداللہ نے حضرت ابن عباس (رض) سے انھوں نے حضرت صعب بن جثامہ (رض) سے نقل کیا کہ ہم مشرکین کے گھروں میں کسی گھر کو شب خون میں فتح کرتے ہیں وہاں ہمارے قصد کے بغیر گھوڑوں کے پاؤں کے نیچے بچے روندے جانے کا کیا حکم ہے ؟ آپ نے فرمایا وہ انہی میں سے ہیں۔ جب جناب رسول اللہ (صلی اللہ علیہ وآلہ وسلم) نے ان کو شب خون سے منع نہیں فرمایا اور اس میں تو وہ بچوں اور عورتوں تک کو پہنچتے ہیں کہ جن کا قتل حرام ہے تو اس سے یہ دلیل مل گئی کہ ان روایات میں جواز کا وہ سبب نہیں جس کی ممانعت گزشتہ روایات میں وارد ہے یعنی عورتوں اور بچوں کو قصداً قتل کرنا اور جواز کی صورت جس کا ان روایات سے ثبوت ملتا ہے وہ بلاقصد ہے کہ اصل تو مشرکین کے قتل کا ارادہ ہو خواہ اس میں وہ ہلاک ہوں جن کے قتل کا ارادہ نہیں۔ اب اس تاویل سے احادیث کا تضاد ختم ہوجائے گا اور تمام احادیث اپنے اپنے مقام پر درست قرار پائیں گی۔ جناب رسول اللہ (صلی اللہ علیہ وآلہ وسلم) نے دشمن پر شب خون اور لوٹ کا حکم دیا اور متعدد بار آپ نے خود شب خون میں شرکت فرمائی جیسا کہ باب الدعاء قبل القتال میں ہم تذکرہ کرچکے اور جہاں تک ہمارا علم ہے کسی روایت میں شب خون کی ممانعت ثابت نہیں ہے اور یہ بات جانی پہچانی ہے کہ شب خون والی حالت میں آپ کے سامنے یہ بات معلوم تھی کہ اس میں بچوں اور عورتوں کی ہلاکت ہوگی مگر آپ نے دشمن پر اس کو جائز رکھا کیونکہ اصل مقصود تو دوسروں کو قتل کرنا ہوتا تھا اور یہ بات حضرت صعب بن جثامہ (رض) والی روایت کے مفہوم کے موافق ہے اور نظر بھی اسی کی تائید کرتی ہے کیونکہ قصد تو جنگجو لوگوں کا قتل ہے۔ حالانکہ جناب رسول اللہ (صلی اللہ علیہ وآلہ وسلم) سے وہ روایت وارد ہے جو اس شخص سے متعلق ہے جس کے بازو کو ایک شخص نے دانتوں سے کاٹا۔ اس آدمی نے اپنے بازو کو قوت سے اس کے دانتوں سے چھڑایا تو (جھٹکے کی وجہ سے) کاٹنے والے کے دو سامنے والے دانت گرگئے آپ (صلی اللہ علیہ وآلہ وسلم) نے اس کے بدلے کو باطل قرار دیا اور اس سلسلے میں متواتر روایات وارد ہیں۔ ملاحظہ ہوں۔
تخریج : مسند احمد ٤؍٧٣۔