٥٠٧٣: ابو محمد مولیٰ ابو قتادہ نے حضرت ابو قتادہ بن ربعی (رض) سے نقل کیا کہ ہم جناب رسول اللہ (صلی اللہ علیہ وآلہ وسلم) کے ساتھ حنین کے سال نکلے جب ہمارا کفار سے سامنا ہوا تو مسلمانوں نے حملہ کیا کہتے ہیں کہ میں نے دیکھا کہ ایک مشرک ایک مسلمان پر حملے میں غالب آ رہا ہے میں اس کی طرف گھوما یہاں تک کہ میں نے اس کو پیچھے سے آ کر کندھے کی رگ پر تلوار ماری جس سے اس کی زرہ کی زنجیر کٹ گئی وہ میری طرف متوجہ ہوا اور مجھے زور سے پکڑ کر دبایا یہاں تک کہ میں نے اس سے موت کی بو محسوس کی پھر وہ مرگیا اور مجھے چھوڑ دیا تو میں عمر (رض) کو ملا اور ان سے پوچھا لوگوں کا کیا حال ہے انھوں نے کہا اللہ تعالیٰ کا حکم اسی طرح تھا۔ پھر لوگ واپس لوٹ گئے جناب رسول اللہ (صلی اللہ علیہ وآلہ وسلم) نے فرمایا جس آدمی نے کسی (مشرک) کو قتل کیا ہو اور اس کے پاس قتل کا ثبوت بھی ہو تو اس کو مقتول کا سامان ملے گا ابو قتادہ کہتے ہیں کہ میں کھڑا ہوا اور میں نے پکار کر کہا کون میرے متعلق گواہی دے گا ؟ پھر میں بیٹھ گیا آپ نے یہ بات پھر دوسری مرتبہ فرمائی اور تیسری مرتبہ فرمائی تو میں کھڑا ہوا۔ جناب رسول اللہ (صلی اللہ علیہ وآلہ وسلم) نے فرمایا اے ابو قتادہ تمہیں کیا ہے ؟ تو میں نے اپنا واقعہ بیان کردیا ایک صحابی نے کہا یارسول اللہ (صلی اللہ علیہ وآلہ وسلم) ! اس نے سچ کہا اور اس مقتول کا سامان میرے پاس ہے یارسول اللہ (صلی اللہ علیہ وآلہ وسلم) ! اس کو میری طرف سے راضی کردیں حضرت ابوبکر (رض) کہنے لگے نہیں اللہ کی قسم ! جناب رسول اللہ (صلی اللہ علیہ وآلہ وسلم) ایسا نہ کریں گے کہ اللہ کے شیروں میں سے ایک شیر اللہ اور اس کے رسول کے لیے لڑتا ہے اور اس کا سامان تمہیں دے دیں۔ جناب رسول اللہ (صلی اللہ علیہ وآلہ وسلم) نے فرمایا ابوبکر نے ٹھیک کہا۔ وہ سامان اس کو دے دو حضرت ابو قتادہ (رض) کہتے ہیں کہ وہ سامان اس نے مجھے دے دیا میں نے وہ زرہ فروخت کر کے بنی سلمہ میں کھجوروں کے درخت خرید لئے۔ یہ اسلام میں پہلا مال تھا جو مجھے ملا۔
تخریج : بخاری فی الخمس باب ١٨‘ المغازی باب ٥٤‘ مسلم فی الجہاد ٤٢‘ ابو داؤد فی الجہاد باب ١٣٦‘ ترمذی فی السیر باب ١٣‘ ابن ماجہ فی الجہاد باب ٢٩‘ مالک فی الجہاد ١٨‘ مسند احمد ٥؍١٢‘ ٢٩٥‘ ٣٠٦۔