٥٠٩١: فضل بن حسن بن عمرو بن حکم بیان کرتے ہیں کہ میری والدہ نے بیان کیا کہ میں اور میری والدہ دونوں حضرت فاطمہ (رض) کی خدمت میں حاضر ہوئیں ہم سب مل کر جناب رسول اللہ (صلی اللہ علیہ وآلہ وسلم) کی خدمت میں حاضر ہوئیں آپ (صلی اللہ علیہ وآلہ وسلم) کسی غزوہ سے تشریف لائے تھے اور اس وقت آپ کے ساتھ غلام تھے میں نے آپ سے سوال کیا کہ ہمیں خادم عنایت فرمائیں تو جناب رسول اللہ (صلی اللہ علیہ وآلہ وسلم) نے فرمایا۔ اہل بدر کے یتیم تم سے سبقت کر گئے۔ امام طحاوی (رح) فرماتے ہیں کہ ایک جماعت اس بات کی طرف گئی ہے کہ جناب رسول اللہ (صلی اللہ علیہ وآلہ وسلم) کے رشتہ داروں کے لیے خمس غنیمت میں سے کوئی مقدار معلوم و متعین نہیں اور دوسروں کے حصہ سے الگ کوئی حصہ نہیں۔ وہ کہتے ہیں کہ اللہ تعالیٰ نے ان کے لیے وہ حصہ مقرر فرمایا جو اس آیت کریمہ میں مذکور ہے۔ واعلموا انما غنمتم من شیٔ ۔۔۔ وابن السبیل)) (الانفال : ٤١) ” وما افاء اللہ علی رسولہ ۔۔۔ المساکین “ (الحشر : ٧) اور تم جان لو کہ جو کوئی چیز تمہیں مال غنیمت سے ملے سو بلاشبہ اللہ تعالیٰ کے لیے اس کا پانچواں حصہ ہے اور رسول کے لیے اور قرابت داروں کے لیے اور یتیموں کے لیے اور مساکین کے لیے اور مسافروں کے لیے اور جو کچھ اللہ تعالیٰ نے اپنے رسول کو ان سے بطور فئی دلوایا سو تم نے اس کے لیے نہ گھوڑے دوڑائے اور نہ اونٹ ‘ لیکن اللہ تعالیٰ اپنے پیغمبروں کو جس پر چاہے غلبہ دے دیتا ہے اور اللہ تعالیٰ کو ہر چیز پر قدرت ہے جو کچھ اللہ تعالیٰ اپنے رسول کو (دوسری) بستیوں والوں سے بطور فئی دلوائے۔ وہ اللہ تعالیٰ ہی کا حق ہے اور رسول کا اور (رسول کے) قرابت داروں کا اور یتیموں کا اور مساکین کا اور مسافروں کا۔ اللہ تعالیٰ نے ان آیات میں ان کے لیے مقرر فرمایا ہے وہ ان کے فقروحاجت کے وقت ہے اسی لیے ان کو فقراء و مساکین میں داخل فرمایا ہے۔ تو جس طرح فقیر ‘ یتیم و مساکین استحقاق کا سبب ختم ہوجانے سے اس سے نکل جاتے ہیں بالکل اسی طرح اقرباء رسول اللہ (صلی اللہ علیہ وآلہ وسلم) کو بھی ان کے ساتھ ملایا گیا تو فقر کی وجہ سے ملایا گیا پس جب وہ مالدار ہوجائیں گے تو اس سے نکل جائیں گے۔ یہ علماء فرماتے ہیں کہ اگر خالص قرابت نبوت کی وجہ سے ان کا حصہ مقرر ہوتا تو حضرت فاطمہ (رض) بھی ان میں سے ہوئیں کیونکہ نسبی اعتبار سے وہ آپ کے قریب تر تھیں اور رحم کے اعتبار سے نزدیک تر تھیں۔ لیکن آپ نے ان کے لیے ان قیدیوں میں حصہ نہیں رکھا جن کا ہم نے تذکرہ کیا اور ان کو کوئی خادم عنایت نہیں فرمایا۔ بلکہ ان کو اللہ تعالیٰ کے ذکر کے حوالے کیا کیونکہ آپ اس میں سے جو کچھ حاصل کرتیں تو آپ صدقہ لینے کی وجہ سے مساکین سے شمار ہوتیں۔ تو آپ (صلی اللہ علیہ وآلہ وسلم) نے خیال فرمایا کہ ان کا اس مطالبہ سے دست بردار ہونا اور اللہ تعالیٰ کے ذکروتسبیح اور تہلیل کی طرف متوجہ ہونا اس سے بہتر اور افضل ہے۔ دوسری بات یہ ہے کہ جناب رسول اللہ (صلی اللہ علیہ وآلہ وسلم) کے بعد حضرت ابوبکر و عمر (رض) نے تمام خمس تقسیم فرما دیا اور قرابت رسول اللہ (صلی اللہ علیہ وآلہ وسلم) کی وجہ سے ان کے لیے عام مسلمانوں کے حق سے کوئی الگ حق خیال نہیں کیا۔ پس اس سے بھی ثابت ہوتا ہے کہ ان کے ہاں بھی یہی حکم ہے اور جب کسی صحابی نے بھی اس کا انکار نہیں کیا اور نہ ہی ان کی مخالفت کی تو ثابت ہوگیا کہ صحابہ کرام کی رائے بھی اس سلسلہ میں یہی تھی۔ پس جب حضرت ابوبکر و عمر (رض) اور تمام صحابہ کرام (رض) کا اس پر اجماع ہوگیا تو یہ قول ثابت ہوگیا اور اس پر عمل کرنا لازم اور اس کے خلاف کو چھوڑنا ضروری ہوگیا۔ تیسری بات یہ ہے کہ جب حضرت علی المرتضیٰ (رض) کو خلافت ملی تو انھوں نے بھی لوگوں کو اسی بات کی ترغیب دی۔ جیسا کہ اس روایت میں مذکور ہے۔