٥١١: زید بن وہب نے نقل کیا کہ عمر (رض) نے ہماری طرف مسح علی الخفین کے سلسلہ میں لکھا کہ مسافر کے لیے تین دن رات اور مقیم کے لیے ایک دن رات کی اجازت ہے۔ یہ حضرت عمر (رض) ہیں کہ ان سے جناب رسول اللہ (صلی اللہ علیہ وآلہ وسلم) کے ارشاد کے موافق روایات مروی ہیں جن میں مسح کی اسی طرح توقیت ہے۔ نیز حدیث عقبہ میں ایک اور احتمال پایا جاتا ہے کہ جناب عمر (رض) سے معلوم کیا کہ حضرت عقبہ (رض) ایسے راستے سے آتے ہیں جو سنسانہ ہے اور اس میں نہیں ملتا تو اس کا حکم تیمم ہی تھا۔ اس لیے انھوں نے عقبہ (رض) سے پوچھا کہ تمہیں جوتے اتارے کتنا عرصہ ہوا ؟ جبکہ یہاں تو تیمم ہی ہے تو حضرت عقبہ (رض) نے ان کو خبر دی جو کچھ خبر دی اور یہ تاویل پہلی تاویل سے بہتر ہے تاکہ حضرت عمر (رض) کی روایت کے موافق ہوجائے اور باہمی تضاد نہ رہے۔ ہم نے جو کچھ تطبیق کے سلسلہ میں ذکر کیا یہ حضرت عمر (رض) کے علاوہ دیگر صحابہ کرام (رض) سے مروی ہے ‘ مرویات ملاحظہ ہوں۔
تخریج : ابن ابی شیبہ ١؍١٦٣‘ عبدالرزاق ١؍٢٠٦
امام طحاوی (رح) فرماتے ہیں یہ حضرت عمر (رض) کہ جن سے ان روایات متواترہ کے مطابق فتویٰ موجود ہے کہ جس میں مقیم و مسافر کے لیے مدت کی تعیین پائی جاتی ہے۔
روایت کا جواب ایک اور رخ سے :
روایت عقبہ (رض) میں یہ احتمال بھی ہے کہ یہ کلام عمر (رض) کا ہو کیونکہ وہ جانتے تھے کہ جس راستے سے وہ مدینہ آتے ہیں اس میں پانی نہیں ہے عقبہ کے لیے وہاں حکم تیمم کا تھا اس لیے انھوں نے پوچھا تمہیں موزے اتارے کتنے دن گزرے اس لیے کہ تمہارے لیے حکم ہی تیمم کا تھا تو عقبہ (رض) نے ان کو یہی اطلاع دی تو انھوں نے فرمایا ” اصبت السنۃ “ اس پر روایت کو محمول کرنا اولیٰ ہے تاکہ ان کے اقوال کے خلاف نہ ہو۔
مدت مسح کی تعیین کے سلسلہ میں دیگر اصحاب رسول اللہ (صلی اللہ علیہ وآلہ وسلم) سے بھی بہت سی روایات وارد ہیں یہاں چند ذکر کی جاتی ہیں۔