٥١٢٥ : قیس سکونی نے حضرت عبداللہ بن عمرو (رض) سے نقل کیا کہ جب حضرت عمرو بن العاص (رض) نے سرزمین مصر کو فتح کرلیا تو ان کے ساتھ جو بھی اصحاب رسول اللہ (صلی اللہ علیہ وآلہ وسلم) تھے ان کو جمع کیا اور ان سے اس کی زمین ان لوگوں کے مابین تقسیم کرنے کے سلسلہ میں مشورہ کیا جو واقعہ میں موجود تھے۔ جس طرح ان کے مابین غنائم کو تقسیم کردیا اور جس طرح جناب رسول اللہ (صلی اللہ علیہ وآلہ وسلم) نے واقعہ خیبر میں حاضر لوگوں کے درمیان خیبر کو تقسیم فرما دیا یا پھر اس کو امیرالمؤمنین کی رائے آنے تک توقف کیا جائے (دو رائے آئیں) نمبر 1: ان میں سے ایک جماعت نے کہا جن میں حضرت زبیر بن العوام (رض) بھی تھے کہ اللہ کی قسم ! یہ معاملہ نہ تو تیرے اختیار میں ہے اور نہ عمر (رض) کے۔ اس زمین کو اللہ تعالیٰ نے ہم پر فتح کیا ہم نے اپنے گھوڑ سوار اور پیدل اس پر دوڑائے اور جو کچھ اس میں ہے اس کو جمع کیا۔ اس کی زمین اس کے اموال کی طرح تقسیم کی حقدار ہے۔ نمبر 2: ان میں سے دوسری جماعت نے کہا ہم اس کو امیرالمؤمنین کی طرف رجوع سے پہلے تقسیم نہ کریں۔ پھر اس پر اتفاق رائے ہوگیا کہ حضرت عمر (رض) کی طرف لکھا جائے اور ان کے خط میں ان آراء کی بھی اطلاع کردی جائے (چنانچہ حضرت عمرو بن عاص (رض) کا خط پہنچا) تو حضرت عمر (رض) نے ان کی طرف یہ خط لکھا۔ بسم اللہ الرحمن الرحیم حمدوصلاۃ کے بعد مجھے تمہاری طرف سے یہ بات پہنچی ہے کہ تم اس بات پر متفق ہو کہ تم مسلمانوں کے عطیات اور دشمن نیز کفار کے مقابلے میں لڑنے والوں کی محنت کو چھین لو۔ اگر میں اس کو تمہارے درمیان تقسیم کر دوں تو تمہارے بعد والے مسلمانوں کے لیے ایسی کوئی چیز باقی نہ رہے گی۔ جس کے ذریعہ وہ تمہارے دشمنوں کے خلاف مضبوط ہو سکیں۔ اگر وہ چیزیں نہ ہوتیں جس سے میں تمہیں اللہ تعالیٰ کی راہ میں آمادہ کروں اور مسلمانوں سے ان کا بوجھ دور کروں اور ان کے کمزوروں اور دیوان والوں پر اسے جاری کرنا نہ ہوتا تو میں اس کو تمہارے درمیان تقسیم کردیتا فلہذا اسے بقیہ مسلمانوں کے لیے بطور غنیمت رہنے دو یہاں تک کہ مسلمانوں کی آخری جماعت کفار سے جنگ کرے۔ والسلام علیکم۔ امام طحاوی فرماتے ہیں اس روایت سے بھی یہ بات ثابت ہوتی ہے کہ مفتوحہ زمینوں کا مسئلہ دشمن سے حاصل شدہ دیگر تمام غنائم سے مختلف ہے جیسا کہ ہم نے ذکر کیا۔ اس روایت میں مذکور ہے کہ آپ (صلی اللہ علیہ وآلہ وسلم) نے خیبر ان لوگوں میں تقسیم کردیا جو فتح میں شریک تھے پس اس سے اس بات کی نفی ہوگئی جس کو ابوحنیفہ ‘ سفیان ثوری (رح) اور ان کے پیروکاروں نے اختیار کیا کہ یہ اراضی مفتوحہ مصائب مسلمین کے لیے روک لی جائیں گی۔ اس روایت میں خیبر کے متعلق پوری تفصیل موجود نہیں ہے خیبر کے متعلق تفصیلی روایت اس بات کو واضح کرتی ہے۔ وہ روایت یہ ہے۔
حاصل روایت : اس روایت سے بھی یہ بات ثابت ہوتی ہے مفتوحہ کہ زمینوں کا مسئلہ دشمن سے حاصل شدہ دیگر تمام غناتم سے مختلف ہے جیسا کہ ہم نے ذکر کیا۔
سوال : اس روایت میں مذکور ہے کہ آپ (صلی اللہ علیہ وآلہ وسلم) نے خیبر ان لوگوں میں تقسیم کردیا جو فتح میں شریک تھے پس اس سے اس بات کی نفی ہوگئی جس کو ابوحنیفہ ‘ سفیان ثوری (رح) اور ان کے پیروکاروں نے اختیار کیا کہ یہ اراضی مفتوحہ مصائب مسلمین کے لیے روک لی جائیں گی۔
جواب : اس روایت میں خیبر کے متعلق پوری تفصیل موجود نہیں ہے خیبر کے متعلق تفصیلی روایت اہل بات کو واضح کرتی ہے۔ وہ روایت یہ ہے۔