٥١٣٠: محمد بن ابی المجالد نے عبداللہ بن ابی اوفیٰ (رض) سے روایت کی ہے جو کہ صحابی رسول اللہ (صلی اللہ علیہ وآلہ وسلم) ہیں کہ ہم جناب رسول اللہ (صلی اللہ علیہ وآلہ وسلم) کے ساتھ خیبر میں تھے ہم میں سے ہر ایک غنائم کے کھانے کی طرف آتا اور وہاں سے اپنی ضرورت کے مطابق لے لیتا تھا۔ اس روایت سے کھانے کا استعمال ثابت ہوا تو اگر کھانا ضرورت کے وقت استعمال کرنے اور اس کے کھانے اور اسے حاجت مسلم میں لگانے میں حرج نہیں تو بالکل اسی طرح جانوروں ہاتھیاروں اور کپڑوں کو لے کر ضرورت کے وقت استعمال میں کوئی حرج نہیں اور یہ مفہوم اس لیے مراد لیا گیا ہے تاکہ دونوں روایات عبداللہ بن ابی اوفیٰ اور روایت رویفع (رض) مفہوم کے لحاظ سے ایک دوسرے کے مخالف نہ ہوں۔ یہی امام ابوحنیفہ ‘ ابو یوسف ‘ محمد (رح) کا قول ہے اور اسی کو ہم اختیار کرتے ہیں۔