٥٢٦٠: سعید بن المسیب نے حضرت جبیر بن مطعم (رض) سے روایت کی ہے۔ جب جناب رسول اللہ (صلی اللہ علیہ وآلہ وسلم) نے ذوی القربیٰ کا حصہ تقسیم فرمایا تو بنو ہاشم اور بنو مطلب کو دیا مگر بنو امیہ کو بالکل عنایت نہیں فرمایا۔ چنانچہ میں اور عثمان (رض) جناب رسول اللہ (صلی اللہ علیہ وآلہ وسلم) کی خدمت میں حاضر ہوئے اور عرض کیا یارسول اللہ (صلی اللہ علیہ وآلہ وسلم) یہ بنو ہاشم کو اللہ تعالیٰ نے آپ کی وجہ سے فضیلت عنایت فرمائی ہمارا اور بنی مطلب کا کیا فرق ہے ؟ ہم اور وہ نسب کے قرابت میں ایک شے ہیں۔ آپ نے فرمایا بنی عبدالمطلب جاہلیت و اسلام دونوں زمانوں میں میرے ساتھ رہے ہیں۔ ہم دیکھتے ہیں کہ جب آپ نے حکم الٰہی کے مطابق اپنے عطیہ کو بنی ہاشم و بنی مطلب دونوں قرابت والوں پر بلاتفریق تقسیم فرمایا اور ان سے اوپر والوں کو محروم رکھا اور انھیں کوئی چیز عنایت نہ فرمائی اس سے یہ ثابت ہوا کہ ان سے اوپر نسب میں شریک ذوی القربیٰ میں شامل نہیں۔ ہمارے نزدیک یہ قول بھی درست نہیں کیونکہ ہم دیکھتے ہیں کہ بنو امیہ اور بنو نوفل دونوں کو محروم کیا گیا اور ان کو کچھ نہیں دیا گیا۔ (ابو لہب کی اولاد بھی محروم رہی) کیونکہ وہ قرابت دار نہ تھے حالانکہ یہ بات درست نہیں کیونکہ قرابت میں ان کا مرتبہ بنو مطلب کے برابر تھا۔ اب جبکہ بنو امیہ اور بنو نوفل قرابت نبوت میں شامل رہے اگرچہ ذوی القربیٰ کے عطیہ میں سے ان کو حصہ نہیں دیا گیا۔ اسی طرح وہ لوگ جو ان سے اوپر ہیں تمام بطون قریش قرابت میں تو داخل رہیں گے اگرچہ ذوی القربیٰ کے حصہ میں سے ان کو نہ دیا جائے گا اور دوسری طرف ملاحظہ کریں کہ آپ (صلی اللہ علیہ وآلہ وسلم) نے ذوی القربیٰ کے اس حصہ میں سے بنو ہاشم کے علاوہ بنو مطلب کو بھی عنایت فرمایا جو کہ فقط قریش سے تھے جو والد کی طرف سے دور والے جد میں شریک تھے۔ حالانکہ بنو امیہ ‘ بنو نوفل یعنی زبیر بن عوام آپ کے والد کی طرف سے قریب تر تھے۔ روایت ملاحظہ ہو۔
تخریج : نسائی فی الفئی باب ٥‘ مسند احمد ٤؍٨١۔