٥٢٦٣: ہشام بن عروہ نے اپنے والد سے روایت کی ہے کہ حضرت زبیر (رض) کو غنیمت میں چار حصے دیئے جاتے ایک حصہ عامۃ المسلمین کے ساتھ دو حصے گھوڑے کے اور ایک حصہ قرابت کا۔ ان روایات سے ثابت ہوتا ہے کہ جناب رسول اللہ (صلی اللہ علیہ وآلہ وسلم) نے حضرت زبیر بن عوام (رض) کو ذوی القربیٰ کے حصہ میں سے قرابت کا حصہ دیا۔ حالانکہ زبیر بنو ہاشم سے نہ تھے اور نہ بنی مطلب سے تھے اور ان کو اس عطیے میں بنو ہاشم اور بنو مطلب کی طرح قرار دیا تو اس سے یہ ثابت ہوگیا کہ ذوی القربیٰ تو بنو ہاشم و بنو مطلب ہی ہیں مگر ان کے علاوہ (قریش) وہ آپ کے قرابت دار ہیں۔ یہ بات درست ہے کہ حضرت زبیر (رض) بنو ہاشم سے نہ تھے مگر ان کی والدہ تو بنو ہاشم سے تھیں۔ اسی وجہ سے جناب رسول اللہ (صلی اللہ علیہ وآلہ وسلم) نے ان کو بھی عنایت فرمایا جتنا عنایت فرمایا۔ وہ والدہ کی وجہ سے دوسرے بنی ہاشم کی طرح ہوگئے۔ اگر بات اسی طرح ہوتی جیسا کہ تم نے بیان کی تو ان کے علاوہ بھی دیگر غیر بنو ہاشم کو آپ عنایت فرماتے جن کی مائیں بنو ہاشم سے تھیں اور کئی غیر بنی ہاشم آپ کے پاس موجود تھے جن کی مائیں ہاشمی تھیں اور والدہ کی طرف سے رشتہ داری میں وہ آپ سے زبیر کی نسبت بہت قریب تر تھے۔ جیسے امامہ بنت ابوالعاص بن ربیع (رض) جناب رسول اللہ (صلی اللہ علیہ وآلہ وسلم) نے اس کو محروم رکھا کوئی چیز ذوی القربیٰ کے حصہ سے عنایت نہیں فرمائی جب کہ بنو امیہ محروم رہے اور وہ بھی بنو امیہ سے تھیں۔ آپ نے ان کو ان کی والدہ ہاشمیہ زینب بنت رسول اللہ (صلی اللہ علیہ وآلہ وسلم) کی وجہ سے کچھ بھی عنایت نہیں فرمایا۔ اسی طرح جعدہ بن ہبیرہ مخزومی بھی محروم رہا اس کو بھی کوئی چیز نہیں دی حالانکہ ان کی والدہ ام ہانی (رض) ہاشمیہ تھیں وہ ابو طالب بن عبدالمطلب کی بیٹی تھیں۔ تو جعدہ کو اپنی ہاشمیہ ماں کی وجہ سے کچھ نہیں دیا گیا جبکہ وہ بنو ہاشم و بنو مطلب دونوں سے متعلق تھے۔ اس سے یہ بات پایہ ثبوت کو پہنچی کہ جناب رسول اللہ (صلی اللہ علیہ وآلہ وسلم) نے ذوی القربیٰ کے حصہ سے زبیر (رض) کو جو کچھ عنایت فرمایا وہ والدہ کی وجہ سے نہیں تھا۔ بلکہ کسی اور وجہ سے تھا۔ پس مذکورہ تفصیل سے یہ بات ثابت ہوئی کہ جناب رسول اللہ (صلی اللہ علیہ وآلہ وسلم) کے ذوی القربیٰ میں بنو ہاشم ‘ بنو مطلب اور ان کے علاوہ جن کو بنی ہاشم اور بنی مطلب کے علاوہ سے قرابت حاصل ہے وہ سب شامل ہیں اللہ تعالیٰ نے اپنے رسول (صلی اللہ علیہ وآلہ وسلم) کو اس آیت کے علاوہ دوسری آیت : وانذر عشیرتک الاقربین (الشعراء : ٢١٤) میں حکم فرمایا کہ اپنے قریبی خاندان کو ڈراؤ۔ آپ نے اس ڈرانے میں بنو ہاشم و بنو مطلب کو خاص نہیں کیا بلکہ اپنی قوم بطون قریش سب کو شامل کیا ان میں ان سے دور والے بنو امیہ اور بنو نوفل بھی شامل تھے۔ روایت ملاحظہ ہو۔