٥٣٥٢: اسباط بن نصر کہتے ہیں کہ سدی کا زعم یہ ہے کہ مصعب بن سعد نے اپنے والد سے یہ بات نقل کی ہے کہ جب فتح مکہ کا دن آیا تو جناب رسول اللہ (صلی اللہ علیہ وآلہ وسلم) نے تمام لوگوں کو امن دیا سوائے چار مردوں اور دو عورتوں کے۔ ان کے متعلق فرمایا ان کو قتل کر ڈالو خواہ یہ کعبہ کے پردوں سے لٹکنے والے ہوں :
نمبر 1 عکرمہ بن ابی جہل۔
نمبر 2 عبداللہ بن خطل۔
نمبر 3 مقیس بن ضبابہ۔
نمبر 4 عبداللہ بن سعد بن ابی سرح۔
تشریح عبداللہ بن خطل کو کعبہ کے پردوں سے لپٹا پایا گیا سعید بن حریث اور عمار بن یاسر (رض) دونوں اس کی طرف دوڑے سعید آگے نکل گئے وہ زور میں زیادہ تھے اور اس کو قتل کردیا اور مقیس بن ضبابہ کو لوگوں نے بازار میں پا کر قتل کردیا باقی عکرمہ (یمن کی طرف) کشتی میں سوار ہو کر چل دیئے طوفان آگیا کشتی والے ایک دوسرے کو کہنے لگے خالص کر کے اللہ کو پکارو تمہارے معبود یہاں کام نہیں دیتے۔ عکرمہ کہنے لگے۔ اگر یہ سمندر میں بچا نہیں سکتے تو خشکی میں بھی بچا نہیں سکتے۔ خشکی میں بھی وہی بچا سکتا ہے۔ اے اللہ میں تجھ سے وعدہ کرتا ہوں اگر تو مجھے اس طوفان سے بچا لے گا تو میں محمد (صلی اللہ علیہ وآلہ وسلم) کی خدمت میں پہنچ کر اپنا ہاتھ ان کے ہاتھ میں رکھ دوں گا میں امید کرتا ہوں کہ وہ مجھے مہربانی سے معاف فرما دیں گے۔ پس وہ اسلام لے آئے۔ باقی عبداللہ بن ابی سرح ‘ حضرت عثمان بن عفان (رض) کے ہاں چھپ گیا جب جناب نبی اکرم (صلی اللہ علیہ وآلہ وسلم) نے عثمان (رض) کو بلایا تو انھوں نے عرض کیا یارسول اللہ (صلی اللہ علیہ وآلہ وسلم) عبداللہ کو بیعت کرلیجئے۔ راوی کہتے ہیں کہ جناب رسول اللہ (صلی اللہ علیہ وآلہ وسلم) نے اپنا سر مبارک اٹھا کر تین مرتبہ اس کی طرف دیکھا۔ ہر مرتبہ آپ نگاہ کو دور کرلیتے پھر تین مرتبہ کے بعد اس کو بیعت کرلیا۔
پھر صحابہ کرام کی طرف متوجہ ہو کر فرمایا کیا تم میں کوئی ایسا آدمی نہ تھا کہ اس کی طرف اٹھ کر اس وقت اس کو قتل کر ڈالتا جبکہ میں نے اس کی بیعت سے ہاتھ روک لیا تھا انھوں نے کہا یارسول اللہ (صلی اللہ علیہ وآلہ وسلم) ! آپ کی بات ہم بوجھ نہیں سکے۔ آپ نے ہماری طرف آنکھ سے کیوں اشارہ نہ کردیا آپ نے فرمایا۔ کسی نبی کی آنکھ بھی خیانت کرنے والی نہیں ہوتی۔ (یعنی وہ کسی چیز کو نظر چرا کر نہیں دیکھتے)
تخریج : بخاری فی الصید باب ١٨‘ والجہاد باب ١٦٩‘ المغازی باب ٤٨‘ مسلم فی الحج ٤٥٠‘ ابو داؤد فی الجہاد باب ١١٧‘ ترمذی فی الجہاد باب ١٨‘ نسائی فی الحج باب ١٠٧‘ والتحریم باب ١٤‘ دارمی فی المناسک باب ٨٨‘ والسیر باب ١٩‘ مالک فی الحج ٢٤٧‘ مسند احمد ٣؍١٦٤‘ ١٨٦‘ ٤؍٤٢٣۔