٥٣٦٨: عبداللہ نے عمران بن ابی انس سے روایت کی کہ بنی مخزوم کے ایک مولیٰ نے مجھے بیان کیا کہ میں نے سعد (رض) سے دریافت کیا گیا کہ جو آدمی خشک کھجور کے بدلے تر کھجور کی بیع سلم کرتا ہے تو سعد فرمانے لگے جناب رسول اللہ (صلی اللہ علیہ وآلہ وسلم) نے ہمیں اس سے منع فرمایا۔ عمران بن ابو انس معروف مشہور آدمی ہیں انھوں نے بھی روایت کو یحییٰ بن ابی کثیر کی طرح روایت کی ہے۔ معانی کو درست اور ان کے مابین تطبیق کا تقاضا یہ ہے کہ عبداللہ بن یزید کی روایت ان سے مختلف ہے تو وہ مرتفع ہوگئی اور عمران والی روایت جس کا مضمون سب روایات میں ہے وہ باقی رہی پس حضرت سعد (رض) والی روایت میں جس نہی کا تذکرہ ہے اس کا تعلق بس ادھار سے ہے۔ روایات کے لحاظ سے مطابقت ثابت کردی گئی تو اب نظری دلیل بھی پیش کی جا رہی ہے تر کھجور کو تر کھجور کے عوض برابر فروخت کرنے میں کسی کو کلام نہیں۔ اسی طرح خشک کھجور کو خشک کھجور کے عوض برابر فروخت کرنے میں سب جواز کے قائل ہیں۔ اگر ان میں سے کسی میں کم زیادہ رطوبت باقی ہو تو اس کی طرف توجہ نہیں کی گئی کہ جس سے خشکی کی حالت کا اعتبار کر کے بیع کو باطل قرار دیں بلکہ خریدو فروخت کے وقت اس کی حالت کا لحاظ رکھا گیا اس کے آئندہ نفع و نقصان یا وزن میں کمی کا لحاظ نہیں کیا گیا۔ پس نظر کا تقاضا یہ ہے کہ تر کھجور کے سلسلہ میں خریدو فروخت کے وقت اس کی حالت کا لحاظ کیا جائے گا آئندہ اس کے خشک ہو کر بدلنے کا لحاظ نہ ہوگا یہ امام ابوحنیفہ (رح) کا قول ہے اور ہمارے ہاں تقاضا نظر بھی یہی ہے۔
عمران بن ابو انس معروف مشہور آدمی ہیں انھوں نے بھی روایت کو یحییٰ بن ابی کثیر کی طرح روایت کیا ہے۔
نوٹ : اس باب میں امام طحاوی (رح) رطب کی بیع کے سلسلہ میں امام ابوحنیفہ (رح) کے مسلک کو ترجیح دے کر اسی کے حق میں نظری دلیل پیش کی ہے اور خود طحاوی (رح) کا رجحان بھی یہی متبادر معلوم ہوتا ہے۔ (مترجم)