٥٤٠٠: وہیب نے عطاء بن حکیم بن ابو زید سے روایت کی ہے کہ میں ایک کام کے لیے ان کے ہاں گیا تو انھوں نے اپنے والد سے روایت کی کہ جناب نبی اکرم (صلی اللہ علیہ وآلہ وسلم) نے فرمایا لوگوں کو چھوڑ دو بعض بعض سے فائدہ اٹھائیں گے جب تم میں سے کوئی نصیحت طلب کرے تو وہ اپنے بھائی کو مخلصانہ نصیحت کرے۔ ان روایات سے معلوم ہوگیا کہ جناب رسول اللہ (صلی اللہ علیہ وآلہ وسلم) نے شہری کو دیہاتی سے سودا کرنے سے اس وجہ سے منع فرمایا کیونکہ شہری کو منڈی کے بھاؤ معلوم ہیں۔ وہ شہریوں پر انتہائی بھاؤ لگائے گا اس طرح ان کو کچھ بھی نفع نہ ہوگا اور جب دیہاتی بازار کا بھاؤ معلوم نہ ہونے کی حالت میں پہنچے گا تو دوسرے شہریوں کو بھی نفع پہنچے گا تو جناب رسول اللہ (صلی اللہ علیہ وآلہ وسلم) نے حکم فرمایا کہ شہریوں اور دیہاتیوں کو خریدو فروخت میں آزاد چھوڑ دیا جائے اور شہریوں کو اس سلسلہ میں ان کے ہاں جانے سے منع کردیا۔ اب جبکہ یہ بات اسی طرح ہے جیسا کہ ہم نے بیان کی تو اب آگے جا کر اس سودہ کرنے کی اباحت ثابت ہوئی جس میں شہریوں کو ضرر نہ ہو۔ جن روایات کو ہم نے ذکر کیا ہے اس میں باہر نکل کر خریدنے والے کا خریدنا وہ شہری کے دیہاتی سے خریدنے کی طرح ہوا۔ پس یہ جناب رسول اللہ (صلی اللہ علیہ وآلہ وسلم) کے قول دعوا الناس یرزق اللہ بعضہم من بعض میں داخل ہے اور اس سے بائع کے خیار کا بطلان بھی ثابت ہوگیا کیونکہ اگر اس کو اختیار ہوگا تو مشتری نفع سے قطعاً محروم رہے گا اور پھر آپ یہ بھی حکم نہ فرماتے کہ اس کے سلسلہ میں کوئی تعرض کرے اور نہ یہ فرماتے کہ کوئی دیہاتی کے لیے خریداری کا ذمہ دار نہ بنے کیونکہ اس کو تو خود ذاتی طور پر بیع کے فسخ کا اختیار حاصل ہے یا اس کی ثمن کے رد کرنے کا اختیار ان اثمان کے ساتھ حاصل ہے جو شہریوں کی بیوع میں ایک دوسرے کی طرف واپس ہوتی ہیں۔ جناب رسول اللہ (صلی اللہ علیہ وآلہ وسلم) کے حاضرین کو اس بات سے روک دینے سے شہریوں کے لیے اس بات کا جواز مل گیا کہ وہ دیہاتیوں کی بے خبری سے فائدہ اٹھائیں اور ان سے سودا خریدیں۔ یہ امام ابوحنیفہ ‘ ابو یوسف ‘ محمد (رح) کا مسلک ہے۔
تخریج : بخاری فی البیوع باب ٦٨‘ مسند احمد ٣؍٤١٨‘ ٤؍٢٥٩۔