٥٤١: یحییٰ بن عیسیٰ نے ابن ابی لیلیٰ سے اور انھوں نے عمرو سے انھوں نے عبداللہ بن سلمہ سے انھوں نے علی (رض) سے روایت نقل کی ہے کہ جناب رسول اللہ (صلی اللہ علیہ وآلہ وسلم) جنابت کے علاوہ ہر حالت میں قرآن مجید کی تعلیم دیتے تھے۔ امام طحاوی (رح) فرماتے ہیں جناب رسول اللہ (صلی اللہ علیہ وآلہ وسلم) سے جو کچھ ہم نے روایت کیا ہے اس سے بلا وضو قراءت قرآن اور ذکر اللہ کی اباحت ثابت ہوتی ہے اور جناب رسول اللہ (صلی اللہ علیہ وآلہ وسلم) کے بغیر طہارت کے ذکر کرنے پر دلالت کرتے ہیں۔
حاصل روایات : ان چھ روایات سے بغیر وضو ذکراللہ اور قراءت قرآن کا جواز معلوم ہو رہا ہے اور قرآن مجید کے متعلق جنابت والے کی ممانعت خاص طور پر نکل رہی ہے اس سے ثابت ہوا کہ ذکراللہ بلا وضو بھی مباح ہے اس کے لیے تائیدی روایات ملاحظہ ہوں۔