٥٤١٤: یونس نے ابن شہاب سے انھوں نے اپنی اسناد سے اسی طرح روایت نقل کی ہے۔ امام طحاوی (رح) فرماتے ہیں کہ یہ حضرت ابن عمر (رض) ہیں جن کے نزدیک سودے میں سے جو موجود میسر آجائے اس کے بعد کہ وہ مال ہلاک ہوگیا تو وہ مشتری کا مال ہے اس سے اس بات پر واضح دلالت مل گئی کہ ان کے ہاں عقد فریقین سے بیع مکمل ہوجاتی ہے اور یہ اس فرقت سے پہلے ہے جو اس کے بعد رونما ہوتی ہے اور مبیعہ عقد خریدو فروخت سے بائع کی ملکیت سے خارج ہو کر مشتری کی ملکیت میں داخل ہوجاتا ہے اس کی ہلاکت مشتری کے مال کی ہلاکت ہے۔ پس یہ بات دلالت میں واضح تر ہے کہ ابن عمر (رض) کا مذہب فرقت عاقدین کے سلسلہ میں جو انھوں نے جناب نبی اکرم (صلی اللہ علیہ وآلہ وسلم) سنا وہی ہے جو فریق اوّل و ثانی نے ذکر کیا ہے۔ روایت ابو برزہ (رض) کا جواب یہ ہے کہ فریق ثالث کی اس روایت میں بھی کوئی دلیل نہیں اس میں روایت گھوڑے کے فروخت ہونے اور پھر رات اپنی منزل میں گزار کر صبح کے وقت بائع کا گھوڑے کی زین کسنے کے لیے کھڑا ہونے کا تذکرہ ہے خریدنے والے نے اپنی خریداری کا ذکر کیا پھر وہ حضرت ابو برزہ (رض) کی خدمت میں جھگڑا لے کر گئے انھوں نے ان کی رضامندی سے جناب رسول اللہ (صلی اللہ علیہ وآلہ وسلم) کے ارشاد کے مطابق فیصلہ کردینے پر اطمینان کا اظہار کیا تو انھوں نے فرمایا بائع و مشتری کو جدا ہونے تک اختیار ہے اور میں تمہیں جدا ہونے والا خیال نہیں کرتا۔ اس روایت میں یہ دلالت پائی جاتی ہے کہ وہ جسمانی طور پر ایک دوسرے سے جدا ہوگئے تھے کیونکہ کھڑے ہو کر گھوڑے کی زین کسنے کا سلسلہ گھوڑا باندھنے کی جگہ میں ہوسکتا ہے اور حضرت ابو برزہ (رض) نے اس کا قطعاً لحاظ نہیں کیا۔ بلکہ فرمایا میں تمہیں جدا ہونے والا خیال نہیں کرتا۔ کیونکہ تمہارا جھگڑا ہے ایک دعویٰ خرید کرتا ہے اور دوسرا منکر ہے تو یہ اصلاً فروخت کا عقد نہیں ہے جس سے سودا مکمل ہوتا ہے پس اس سے جسمانی جدائی تکمیل عقدکا باعث ہے۔ یہ بات تو ثابت نہ ہوسکی۔ پھر ہم نے جناب رسول اللہ (صلی اللہ علیہ وآلہ وسلم) سے ایسی باتیں پائیں جو اس بات پر دال ہیں کہ بات چیت سے ہی مشتری شئی کا مالک بن جاتا ہے جسمانی فرقت کی حاجت نہیں ہے اور وہ یہ روایت ہے کہ جناب رسول اللہ (صلی اللہ علیہ وآلہ وسلم) نے فرمایا۔ من ابتاع طعاما فلا یبیعہ حتی یقبضہ “ (بخاری باب ٥١) ہم مزید روایات اپنے موقعہ پر ذکر کریں گے ان شاء اللہ۔