٥٤٣٥: عبدالملک بن عبدالعزیز نے مسلم بن خالد سے بیان کیا پھر انھوں نے اپنی سند سے اس کی مثل روایت نقل کی ہے۔ علماء نے اس روایت کو ہاتھوں ہاتھ لیا اور قبول کیا ہے۔ امام طحاوی (رح) فرماتے ہیں تمہارا خیال یہ ہے کہ اگر کوئی آدمی بکری خریدے پھر اس کا دودھ دوہے اس کے بعد اس میں ایسا عیب پائے جو تھنوں میں دودھ کے جمع کرنے سے علاوہ ہو تو وہ اس کو لوٹا دے اور وہ دودھ کا مالک ہوجائے گا اور اگر دودھ کی بجائے بچہ جنے تو وہ جانور بائع کی طرف لوٹا دیا جائے گا مگر بچہ خریدار کا ہوگا اور تمہارے ہاں یہ وہ نفع ہے جس کو جناب نبی اکرم (صلی اللہ علیہ وآلہ وسلم) نے ضمان کے بدلے مشتری کیلئے قرار دیا ہے پس ایک صاع کھجور جس کو تھنوں میں دودھ جمع کئے جانے والے جانور کو خریدنے والے پر لازم کرتے ہو کہ بائع کی طرف لوٹانے کی صورت میں یہ اس تمام دودھ کا عوضانہ ہے جو اس نے خریداری کے ایام میں استعمال کیا ہے جس میں سے کچھ تو سودا کے وقت بکری کے تھنوں میں تھا اور کچھ دودھ سودا کرلینے کے بعد اس کے تھنوں میں پیدا ہوا یا وہ کھجوروں کا صاع اس دودھ کا عوض ہے جو سودا کرتے وقت اس کے تھنوں میں موجود تھا۔ اگر بقول تمہارے یہ ان دونوں کے بدلے میں ہے تو اس سے تمہارا قاعدہ مقررہ ٹوٹ گیا کہ تم نے عیب کی وجہ سے بیع کو رد کرنے کی صورت میں دودھ اور بچے دونوں کو مشتری کی ملک قرار دیا کیونکہ تمہارے ہاں اس کا حکم اس نفع کی طرح ہے جس کو جناب رسول اللہ (صلی اللہ علیہ وآلہ وسلم) نے ضمان کی وجہ سے مشتری کے لیے قرار دیا اور اگر کھجوروں کا وہ صاع اس دودھ کا عوض ہے جو سودا کرتے وقت اس کے تھنوں میں پایا جاتا تھا اور باقی تمام کا تمام مشتری کیلئے ہوگا کیونکہ یہ نفع کا حصہ ہے تو تم نے قرض دودھ کے بدلے مالک کے لیے ایک صاع کھجور بطور قرض لازم کردیں اور یہ بات تمہارے اور دوسروں کے ہاں بھی جائز نہیں ہے۔ بہرحال ان دونوں باتوں میں سے جو بات بھی تمہارے ہاں درست ہو اس سے کسی نہ کسی قاعدہ کا ترک لازم آئے گا اگرچہ تمہارا قول دوسروں کے قول سے بہتر ہے کہ مصراۃ کا حکم منسوخ ہوچکا ہے۔ کیونکہ تم اس دودھ کو نفع کے حکم میں قرار دیتے ہو اور دوسروں کے ہاں اس طرح نہیں۔