٥٤٤٧: اسحاق بن عبداللہ نے حضرت انس بن مالک (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے بیع محاقلہ اور مزابنہ ‘ مخاضرہ ‘ ملامسہ ‘ منابذہ سے منع فرمایا۔ عمر بن یونس کہتے ہیں کہ میرے والد فرماتے مخاضرہ۔ سبز پھل کی بیع کرنا یہ جائز نہیں جب تک سرخ و زرد نہ ہوجائے۔
تخریج : بخاری فی البیوع باب ٩٣‘ نسائی فی الایمان باب ٤٥۔
لغات : محاقلہ۔ گندم جو سٹے میں ہو اس کی بیع خشک گندم کے بدلے۔ مزابنہ۔ درخت پر لگے ہوئے پھل کا اندازہ کر کے توڑے ہوئے مقررہ مقدار پھل کے بدلے فروخت کرنا۔ مخاضرہ۔ کھجور کے سبز پھل کی بیع۔ ملامسہ۔ یہ کہہ کر بیع کرنا کہ اس کی بیع اس وقت ہوگی جب میں نے یا تو نے ہاتھ لگا دیا۔ منابذہ۔ ان چیزوں میں سے جس پر کنکری گرے وہ اس قدر قیمت میں میں نے خرید لی (شروح مشکوٰۃ)