٥٤٧: عبداللہ بن سلیمان نے ثعلبہ بن ابی الکنود سے اور انھوں نے مالک بن عبادہ الغافقی (رض) سے روایت ہے کہ جناب رسول اللہ (صلی اللہ علیہ وآلہ وسلم) نے جنابت کی حالت میں کھایا میں نے عمر بن خطاب کو یہ بات بتلائی تو وہ مجھے کھینچ کر جناب رسول اللہ (صلی اللہ علیہ وآلہ وسلم) کی خدمت میں لائے اور کہنے لگے یارسول اللہ ! اس نے مجھے بتلایا ہے کہ آپ نے حالت جنابت میں کھایا ہے آپ (صلی اللہ علیہ وآلہ وسلم) نے فرمایا ہاں جب میں وضو کرلیتا ہوں تو کھا پی لیتا ہوں لیکن میں اس وضو سے نماز نہیں پڑھتا اور نہ قرآن مجید کی تلاوت کرتا ہوں جب تک کہ غسل نہ کرلوں۔ ان ہر دو روایات سے ثابت ہوتا ہے کہ جنابت والے آدمی کو قرآن مجید پڑھنا ممنوع ہے۔ ایک روایت میں حیض والی عورت کے لیے ممانعت کا ثبوت ہے۔ حضرت علی (رض) کی روایت سے معلوم ہوا کہ بےوضگی کی حالت میں قرات قرآن کی ممانعت نہیں ہے اور حیض و جنابت کی حالت میں خاص طور پر قرآن مجید کی قراءت مکروہ تحریمی ہے۔ اب ہم نظری طور پر دیکھنا چاہتے ہیں کہ ان روایات میں آخری حکم والی روایت کونسی ہے ؟ تاکہ ہم اس سے پہلی روایات کے لیے ناسخ قرار دیں۔ ان روایات کو دیکھئے۔
تخریج : طبرانی معجم کبیر ١؍٢٩٥‘ دارقطنی ١؍١١٩
حاصل روایت : ان دونوں روایتوں سے یہ بات ثابت ہو رہی ہے کہ حالت جنابت میں قرآن مجید کی قراءت اور نماز درست نہیں اسی طرح عورت کو حالت حیض میں بھی دونوں ممنوع ہیں۔
اور پہلے علی (رض) کی روایت گزری اس سے حالت حدث میں ذکراللہ اور قراءت قرآن کی اجازت ثابت ہوئی بشرطیکہ وہ حدث اکبر جنابت و حیض وغیرہ نہ ہو قرآن مجید کی تلاوت خاص طور پر حالت جنابت و حیض میں درست نہیں۔
اب ان آثار میں اگر تقدیم و تاخیر معلوم ہوجائے تو پھر موخر کو ناسخ بنا کر نتیجہ پر پہنچنا آسان ہے۔