٥٥١٩: شعبی نے حضرت جابر بن عبداللہ (رض) سے روایت کی ہے کہ میں جناب رسول اللہ (صلی اللہ علیہ وآلہ وسلم) کی معیت میں ایک اونٹ پر سفر کررہا تھا سفر نے اونٹ کو تھکا دیا جناب رسول اللہ (صلی اللہ علیہ وآلہ وسلم) آ کر ملے اور فرمایا اے جابر ! کیا معاملہ ہے ؟ میں نے کہا میرا اونٹ چلنے سے رہ گیا آپ نے فرمایا کیا تمہارے پاس کوئی چیز ہے میں نے آپ کو ایک کھجور کی شاخ تھمائی تو آپ نے اس اونٹ کو کچوکا دیا یا وہ چھڑی ماری تو وہ اونٹ اس تیزی سے چلنے لگا آج تک کبھی ایسا نہ چلا ہوگا۔ فریق اوّل کے مؤقف کا جواب : حضرت جابر (رض) کی پیش کردہ روایت میں دو ایسی باتیں ہیں جو اس بات پر دلالت کرتی ہیں کہ اس میں فریق اوّل کی دلیل ندارد ہے۔ امام طحاوی (رح) فرماتے ہیں کہ علماء کی ایک جماعت کا خیال یہ ہے جب کوئی آدمی دوسرے کو مقرر ثمن کے بدلے کوئی چیز فروخت کر دے اور شرط یہ لگائے کہ وہ فلاں جگہ تک اس پر سواری کرے گا یہ بیع جائز ہے اور شرط بھی درست ہے اس کی دلیل یہ روایت جابر (رض) ہے۔ دوسروں نے کہا اس کے علماء دو جماعتوں میں بٹ گے
نمبر ١ بیع درست شرط باطل ہو۔
نمبر ٢ بیع فاسد ہوگی ان دونوں جماعتوں کے مؤقف کی عنقریب وضاحت کریں گے۔ حضرت جابر (رض) کی پیش کردہ روایت میں دو ایسی باتیں ہیں جو اس بات پر دلالت کرتی ہیں کہ اس میں فریق اوّل کی دلیل ندارد ہے۔ جناب نبی اکرم (صلی اللہ علیہ وآلہ وسلم) کا حضرت جابر (رض) سے نرخ مقرر فرمانا صرف اونٹ کے لیے تھا اور اس میں سواری کی کوئی شرط نہ تھی حضرت جابر (رض) کہتے ہیں کہ میں نے اس کو فروخت کیا اور اپنے گھر آنے تک اس پر سواری کو مستثنیٰ کیا تو روایت کا مطلب یہ ہوا کہ سودا تو صرف اونٹ کا ہوا اسی کا نرخ جناب نبی اکرم (صلی اللہ علیہ وآلہ وسلم) نے ایک اوقیہ چاندی مقرر فرمائی۔ سواری کا ستثناء بعد میں ہوا۔ پس یہ استثناء بیع سے الگ ہے کیونکہ وہ سودے کے بعد ہوا اس روایت میں بیع کے وقت استثناء کی شرط اور اس کا کوئی حکم موجود نہیں ہے۔ حضرت جابر (رض) کہتے ہیں کہ جب میں مدینہ منورہ آیا تو جناب رسول اللہ (صلی اللہ علیہ وآلہ وسلم) کی خدمت میں اونٹ لے کر حاضر ہوا اور عرض کیا یارسول اللہ (صلی اللہ علیہ وآلہ وسلم) ! یہ اپنا اونٹ لے لیں تو آپ نے فرمایا شاید تمہارا خیال ہو کہ میں نے تمہیں اونٹ حاصل کرنے کے لیے روکا۔ اے بلال ایک اوقیہ چاندی دے دو اور اے جابر (رض) آپ اپنا ونٹ بھی لے جائیں یہ دونوں تمہارے ہیں۔ اس میں اس بات کی ظاہر دلالت ہے کہ پہلا قول سودے سے متعلق ہی نہ تھا اگر اس علت کے ثبوت کے بعد سواری کی شرط ثابت بھی ہوجائے کہ وہ اصل بیع میں تھی تو پھر بھی یہ حدیث فریق اوّل کی دلیل نہیں بن سکتی کیونکہ جس میں یہ شرط ہو وہ سرے سے بیع ہی نہیں (کہ بیع کا اس پر حکم لگے) جب جناب رسول اللہ (صلی اللہ علیہ وآلہ وسلم) جابر (رض) کی طرف سے اونٹ کے مالک ہی نہیں بنے تو اب جابر (رض) کا سواری کی شرط لگانا اپنے اپنی سواری سے متعلق تھا۔ بالفرض اگر یہ شرط اس بیع میں واقع ہو جس سے خریدنے والے کے لیے ملک ثابت ہوجاتی ہے تو اس کے حکم پر بھی اس روایت میں کوئی دلالت نہیں پائی جاتی۔ جو حضرات بیع کو درست قرار دیتے ہیں مگر شرط کو خلاف عقد ہونے کی وجہ سے باطل کہتے ہیں ان کی دلیل روایت بریرہ (رض) ہے۔ روایت بریرہ ملاحظہ ہو۔