٥٥٢٧: ابن وہب نے مالک سے پھر انھوں نے اپنی اسناد سے اسی طرح روایت کی ہے۔ اس روایت میں بھی زہری کی روایت کی طرح ہے کہ بریرہ کے مالکان کی طرف سے ولاء کی شرط تھی اور انکار حضرت عائشہ (رض) کی طرف سے تھا کہ ولاء میری ہوگی تو میں یعنی عائشہ (رض) ، بریرہ کی طرف سے بدل کتابت ادا کر دوں گی۔ اب زہری اور ہشام دونوں اس بات پر متفق ہیں اور حدیث اوّل کے روات اس کے خلاف ہیں البتہ زہری نے ہشام سے چند الفاظ زائد بیان کئے ہیں۔ کہ ” خذیہا واشترطی ‘ فانما الولاء لمن اعتق ‘ کذا فی روایۃ ہشام “ روایت زہری میں کلام کی جگہ تو یہ الفاظ ہیں ” ابتاعی واعتقی ‘ فانما الولاء لمن اعتق “ اس میں ہشام و زہری کا اختلاف ہے۔ اگر ضبط و اتقان کا لحاظ کیا جائے تو ہشام سے زہری کا مرتبہ بڑھ کر ہے پس اس کی روایت کو لیا جائے اور دوسری روایت چھوڑ دی جائے۔ اگر تاویل کو دیکھا جائے تو ” خذیہا “ کا معنی خریدنا ہے جیسا کہ کہتے ہیں ” بکم اخذ ہذا العبد ؟ “ اس سے مراد خریدنا ہوتا ہے۔ جیسا کہتے ہیں ” خذ ہذا العبد بالف درہم “ مراد بیع کرنا ہے۔ پھر جناب رسول اللہ (صلی اللہ علیہ وآلہ وسلم) نے فرمایا ” اشترطی “ مگر شرط کی وضاحت نہیں۔ تو ممکن ہے کہ اس سے مراد یہ ہو کہ جو صحیح بیوع میں شرط لگاتے ہیں وہ لگا لو۔ روایت ہشام میں اس کا معنی ظاہر کرنے والی کوئی بات نہیں اور حدیث زہری کے کوئی بات مخالف بھی نہیں اور ان دونوں روایتوں میں یہ مذکور نہیں کہ جب ایسی شرط لگا دی جائے تو اس کا کیا حکم ہوگا۔ بیع فاسد ہوگی یا جائز ہوگی۔