٥٥٩: حدثنا حجاج قال حدثنا ہمام عن قتادہ نے اپنی اسناد سے اسی طرح روایت نقل کی ہے۔ ہماری روایت کردہ احادیث سے حضرت ابن عباس (رض) اور ان کے پیروکاروں کی روایت کا نسخ ثابت ہو رہا ہے اور حضرت علی (رض) کی روایت کے ثبوت سے اور صحابہ کرام (رض) کے اقوال سے اس کی مزید پختگی ظاہر ہوتی ہے۔ ہم اسی کو اختیار کرتے ہیں۔ چنانچہ جنبی اور حائض کے لیے قرآنِ مجید کی آیت کو پورا پڑھنا مکروہ قرار دیتے ہیں اور بےوضو آدمی کے لیے قراءت قرآن مجید میں کچھ حرج نہیں سمجھتے اور ذکر اللہ میں تو ہم بےوضو ‘ حائض ‘ جنبی کسی کے لیے بھی کچھ حرج نہیں خیال کرتے اور حضرت عمر (رض) سے جنابت والے کو قراءت قرآنی سے روکنا خود منقول ہے اور وہ ہمارے قول کے موافق ہے۔
حاصل کلام : ان روایات و آثار سے اس بات کی مزید تائید ہوگئی کہ حدیث ابن عباس (رض) وغیرہ منسوخ ہے اور حضرت علی (رض) والی روایت کی ان اقوال صحابہ اور تابعین سے تائید ہوتی ہے۔
اسی وجہ سے ہمارے ہاں قرآن مجید کی مکمل آیت ضرورت کیلئے پڑھنا بھی درست نہیں ہاں ایک ایک لفظ الگ الگ مجبوراً پڑھ سکتے ہیں البتہ بلاوضو ذکراللہ اور قراءت قرآن میں کوئی حرج نہیں جنابت والے کے لیے قراءت قرآن مجید کی ممانعت میں حضرت فاروق اعظم (رض) کا قول ملاحظہ ہو۔