٥٦٠٠: سلمیٰ (رض) ام رافع نے ابو رافع سے روایت کی ہے۔ کہ جبرائیل (علیہ السلام) جناب رسول اللہ (صلی اللہ علیہ وآلہ وسلم) کی خدمت میں آئے اور اجازت طلب کی جو دے دی گئی مگر انھوں نے اندر آنے میں دیر کی تو جناب رسول اللہ (صلی اللہ علیہ وآلہ وسلم) چادر مبارک لیے باہر تشریف لائے اور فرمایا ہم نے تمہیں اجازت دے دی جبرائیل بولے یارسول اللہ (صلی اللہ علیہ وآلہ وسلم) جی ہاں۔ لیکن ہم ایسے گھر میں داخل نہیں ہوتے جہاں تصویر اور کتا ہو۔ پس گھر والے لوگوں نے دیکھا کہ گھر کے ایک کونے میں کتے کا بچہ ہے پس آپ نے ابو رافع (رض) کو حکم فرمایا مدینہ منورہ میں جس کتے کو پائیں قتل کردیں اچانک وہ مدینہ کی ایک جانب میں پہنچے جہاں ایک عورت کے پاس ایک کتا پایا جو اس کی بکریوں کی حفاظت کرتا تھا۔ ابو رافع کہتے ہیں مجھے اس پر رحم آیا تو جناب نبی اکرم (صلی اللہ علیہ وآلہ وسلم) کی خدمت میں آیا اور صورت حال ذکر کردی تو آپ نے اس کے بھی مار ڈالنے کا حکم فرمایا۔ پھر آپ کی خدمت میں کچھ لوگ آ کر کہنے لگے یارسول اللہ (صلی اللہ علیہ وآلہ وسلم) جس مخلوق کے قتل کا حکم ملا ہے اس میں سے ہمارے لیے کیا جائز ہے ؟ تو یہ آیت نازل ہوئی یسئلونک ماذا احل لہم قل احل لکم الطیبات وما علمتم من الجوارح مکلبین “ (المائدہ : ٤)