٥٧٢: عروہ نے بتلایا کہ عائشہ (رض) کہتی ہیں کہ جناب نبی اکرم (صلی اللہ علیہ وآلہ وسلم) کے پاس ایک بچہ تخنیک کے لیے اور دعا کے لیے لایا گیا اس نے آپ کے کپڑوں پر پیشاب کردیا آپ (صلی اللہ علیہ وآلہ وسلم) نے اس پر پانی بہایا اس کو مل کر نہ دھویا۔ (تخنیک : کوئی چیز چبا کر بچے کے مُنہ میں ڈالنا یہ مسنون ہے) امام طحاوی (رح) فرماتے ہیں کہ کچھ علماء کا خیال یہ ہے کہ لڑکے اور لڑکی کے پیشاب کا حکم مختلف ہے اور یہ فرق کھانا کھانے سے پہلے تک ہے۔ چنانچہ ان کا قول یہ ہے کہ لڑکے کا پیشاب پاک ہے اور لڑکی کا پیشاب نجس ہے۔ علمائے کرام کی دوسری جماعت اس کے خلاف ہے۔ چنانچہ انھوں نے دونوں کو حکم میں برابر قرار دیا اور دونوں کو نجس قرار دیا اور پہلے قول والوں کے جواب میں یہ فرمایا کہ جناب رسول اللہ (صلی اللہ علیہ وآلہ وسلم) کے ارشاد : ((بول الغلام ینضح)) میں احتمال ہے۔ نضح کا معنی بہانا ہے۔ عرب کے ہاں اس کا استعمال پایا جاتا ہے۔ جناب نبی اکرم (صلی اللہ علیہ وآلہ وسلم) کے ارشاد : ((انی لا عرف مدینۃ ینضح البحر بجانبھا)) سے بہنا مراد ہے یہاں چھڑکنا معنی نہیں ہوسکتا۔ البتہ اس لحاظ سے فرق ہے کہ لڑکے کا پیشاب ایک دہانے سے خارج ہوتا ہے کیونکہ نکلنے کا مقام چھوٹا ہوتا ہے اور لڑکی کا پیشاب وسیع مخرج سے نکلتا ہے۔ اس لیے آپ (صلی اللہ علیہ وآلہ وسلم) نے لڑکے کے پیشاب میں پانی کے فقط بہا دینے کا حکم فرمایا اور لڑکی کے پیشاب کے سلسلہ میں پہ در پہ پانی ڈالنے کا حکم فرمایا کیونکہ وہ الگ الگ مقام پر پڑتا ہے اور ہمارا مذکورہ احتمال بعض تابعین (رح) سے منقول ہے جو اسی معنی کو ثابت کرتا ہے۔
تخریج : بخاری فی الوضوء باب ٥٩‘ مسلم فی الطھارۃ ١٠١‘ نسائی فی الطھارۃ باب ١٨٨‘ مالک فی الطھارۃ ١١٠‘ بیہقی سنن کبریٰ ٢؍٤١٤‘ مصنفقہ عبدالرزاق ١٤٨٩۔
حاصل روایات : ان روایات ستہ سے معلوم ہو رہا ہے کہ لڑکے کے پیشاب پر پانی ڈالنے میں مبالغہ نہ کیا جائے گا بلکہ بہا دیا یا چھڑ ک دیا جائے گا اور لڑکی کے پیشاب میں خوب دھویا جائے گا اس سے معلوم ہوتا ہے کہ لڑکے کے پیشاب میں نجاست نہیں لڑکی کے پیشاب میں نجاست ہے اسی وجہ سے اس سے طہارت بھی اچھے انداز سے حاصل ہوگی ان روایات میں لڑکے کے لیے نضح کا حکم ہے غسل کا حکم صرف لڑکی کے لیے فرمایا۔ دونوں کے حکم میں فرق دونوں کے نجاست و طہارت کے فرق کو ظاہر کرتا ہے۔
ان تمام روایات میں نضح کا لفظ وارد ہے اس پر تمام روایات کا مدار ہے اگر اس کے معنی کی تحقیق ہوجائے تو توافق روایات کا آسان حل نکل آئے گا۔
لفظ نضح کی تحقیق :
نمبر ١: نضح کا معنی بہانا ہے پس بول الغلام ینضح کا معنی یہ ہے لڑکے کے پیشاب پر پانی بہا دیا جائے۔
نمبر ٢: اہل عرب بہانے کو نضح کہتے ہیں جیسا اس ارشاد نبوی میں ہے انی لاعرف مدینۃ ینضح البحر بجانبھا میں ایک ایسے شہرکو جانتا ہوں جس کے ایک جانب پانی بہہ رہا ہے اور نہریں مارتا ہے۔
نمبر ٣: چھڑکنا بھی آتا ہے۔
نمبر ٤: غسل خفیف جیسا کہ بخاری میں دم حیض کے متعلق نضح کا لفظ آیا ہے۔
سوال : اگر اس کا معنی بھی دھونا ہے تو الگ لفظ لانے کی ضرورت کیا تھی۔
جواب : الگ لفظ لانے میں حکمت یہ ہے کہ ان کی نوعیت میں فرق ہے لڑکے کا پیشاب مخرج تنگ ہونے کی وجہ سے ایک جگہ گرے گا نیز اس میں تعفن بھی کم ہے اور لڑکی کا پیشاب مخرج کی وسعت کی وجہ سے کئی جگہ پڑے گا اور اس میں غلاظت و تعفن بھی زیادہ ہے اس لیے لڑکے کے لیے فقط پانی بہا دینے والا لفظ لایا گیا کہ مبالغہ غسل کی ضرورت نہیں اور لڑکی کے لیے مسلسل مل کر دھونے کا حکم دیا گیا۔
ہم نے یہ کوئی نیا مفہوم نہیں لیا بلکہ تابعین سے یہ بات ثابت ہے ہم دو ثبوت پیش کرتے ہیں۔