٥٨٤: ابو رافع مولیٰ عمر (رض) نے حضرت ابن مسعود (رض) سے نقل کیا کہ عبداللہ لیلۃ الجن میں جناب رسول اللہ (صلی اللہ علیہ وآلہ وسلم) کے ساتھ تھے۔ جناب رسول اللہ (صلی اللہ علیہ وآلہ وسلم) کو وضو کی ضرورت پیش آئی اور ابن مسعود کے پاس نبیذ کے علاوہ کچھ نہ تھا تو جناب رسول اللہ (صلی اللہ علیہ وآلہ وسلم) نے فرمایا کھجور پاکیزہ اور پانی پاک ہے پس اس سے جناب رسول اللہ (صلی اللہ علیہ وآلہ وسلم) نے وضو فرمایا۔ امام طحاوی (رح) فرماتے ہیں علماء کی ایک جماعت کی رائے یہ ہے کہ جس شخص کے پاس سفر میں ایسا پانی موجود ہو جس میں کھجوریں بھگوئی گئی ہوں اور اس کے علاوہ پانی نہ ہو تو وہ اس کے ساتھ وضو کرے انھوں نے ان آثار سے استدلال کیا ہے۔ اس جواز کے قائلین میں امام ابوحنیفہ (رح) کا نام بھی آتا ہے۔ مگر دیگر علماء نے اس کے برعکس کہا کہ بھگوئی ہوئی کھجور والے پانی سے وضو جائز نہیں۔ جو اس کے سوا نہ پائے وہ تیمم کرے۔ وہ اس سے بالکل وضو نہ کرے۔ اس قول کو امام ابویوسف (رح) نے اختیار کیا۔ انھوں نے پہلے قول کو اختیار کرنے والوں کے خلاف یہ دلیل پیش کی کہ ابن مسعود (رض) کی وہ روایت جس کو آپ استدلال میں پیش کرتے ہیں اور اس کے لیے جتنی اسناد پیش کی ہیں وہ ان لوگوں کے ہاں بھی جو خبر واحد کو حجت مانتے ہیں قابل حجت نہیں ہیں کیونکہ راوی کا بیان پوری وضاحت سے پایا نہیں جاتا تاکہ متواتر طرق سے آئی ہوئی روایت کو قبول کرلیا جاتا۔ پس دونوں فریق کے ہاں اس روایت پر عمل درست نہ ہوا البتہ ابوعبیدہ بن عبداللہ (رض) کے بیان کردہ اثر میں ہے کہ حضرت ابن مسعود (رض) لیلۃ الجن میں موجود ہی نہ تھے۔
تخریج : دارقطنی فی السنن ١؍٧٧۔
حاصل روایات : سفر میں پانی نہ ملنے کی صورت میں نبیذ تمر سے وضو جائز ہے اس وقت تیمم نہ کیا جائے گا جیسا کہ نبی اکرم (صلی اللہ علیہ وآلہ وسلم) نے وضو ہی فرمایا ۔
فریق دوم : کا مؤقف یہ ہے کہ نبیذ تمر سے وضو جائز نہیں تیمم کیا جائے گا۔
فریق اوّل کی روایات کا جواب نمبر ١:
جن اسناد سے یہ روایات وارد ہیں وہ خبر واحد ہیں اور کمزور ہیں خبر واحد سے حجت اس وقت پکڑی جاتی ہے جبکہ روایات کثرت سے ہوں پس اس خبر واحدکو نبیذ سے وجوب وضو کے لیے پیش نہیں کرسکتے ۔ اس کی سند میں ابن لہیعہ اور دوسری میں علی بن زید بن جدعان کمزور راوی ہیں خبر واحد سے کتاب اللہ پر اضافہ جب تک تو اتر نہ ہو نہیں ہوسکتا۔
جواب نمبر ٢: ابو عبید بن عبداللہ جن کی روایت نقل کی گئی ان سے خود ایسی روایات ثابت ہیں جو یہ ظاہر کرتی ہیں کہ عبداللہ بن مسعود (رض) لیلۃ الجن میں جناب رسول اللہ (صلی اللہ علیہ وآلہ وسلم) کے ساتھ نہ تھے۔