٥٩١٨: حرام بن محیصہ بنی حارثہ سے تھے انھوں نے اپنے والد سے اسی طرح روایت نقل کی ہے۔ ان روایات سے یہ دلالت مل گئی کہ یہ اباحت ممانعت کے بعد تھی اور وہ ممانعت عام اور مطلق تھی۔ جیسا کہ پہلے آثار اس پر دلالت کرتے ہیں اور آپ (صلی اللہ علیہ وآلہ وسلم) کا فرمانا کہ اسے اپنے غلام یا پانی والے اونٹ کو کھلا دو ۔ یہ واضح دلیل ہے کہ یہ حرام نہ تھی ذرا غور تو فرمائیں کہ جو مال حرام ہے وہ اپنے غلام کو کھلانا اور اپنے پانی والے اونٹ کو کھلانا بھی جائز نہیں۔ کیونکہ جناب رسول اللہ (صلی اللہ علیہ وآلہ وسلم) نے غلاموں کے سلسلہ میں فرمایا : اطعموہم مماتأکلون “ (بخاری فی الزہد : ٧٤) پس جب محیصہ (رض) کے لیے اس کی اباحت ثابت ہوگئی کہ وہ اپنے پانی والے اونٹ کو کھلائیں یا اپنے غلام کو اپنے حجام کی اجرت کھلائیں اس سے سابقہ نہی کا نسخ معلوم ہوتا ہے اور اس اجرت کی اس کے لیے اور دوسروں کے لیے حلت ثابت ہوئی۔ یہ امام ابوحنیفہ ‘ ابو یوسف ‘ محمد رحمہم اللہ کا قول ہے۔ ہمارے نزدیک نظر کا تقاضا بھی یہی ہے کہ یہ حلال ہو۔ کیونکہ ہم دیکھتے ہیں کہ آدمی کسی سے اجارے کا معاملہ کرتا ہے اور اپنی رگ میں اس سے فصد کھلواتا ہے یا تو یہ جائز ہوگا اور اس پر حصول اجرت بھی جائز ہے حجامت کا بھی یہی حال ہے۔ جناب رسول اللہ (صلی اللہ علیہ وآلہ وسلم) کی وفات کے بعد صحابہ کرام سے بھی اس کی اباحت مروی ہے۔
تخریج : بخاری فی الزہد ٧٤‘ مسند احمد ٤؍٣٦‘ ٣؍١٦٨۔
اقوال صحابہ کرام (رض) سے تائید :
جناب رسول اللہ (صلی اللہ علیہ وآلہ وسلم) کی وفات کے بعد صحابہ کرام سے بھی اس کی اباحت مروی ہے۔