٥٩٣٥: ابو صالح نے حضرت ابوہریرہ (رض) سے روایت کی ہے کہ جناب نبی اکرم (صلی اللہ علیہ وآلہ وسلم) سے گمشدہ بکریوں کے متعلق دریافت کیا گیا آپ نے فرمایا وہ تیری یا تیرے بھائی یا پھر بھیڑئے کی ہے اور آپ سے گمشدہ اونٹ کے متعلق دریافت کیا گیا تو آپ نے فرمایا تمہیں ان سے کیا غرض ان کی مشک اور موزہ ان کے پاس ہے اس کو چھوڑ دو یہاں تک کہ اس کا مالک اس کو پالے۔ اس روایت میں جناب رسول اللہ (صلی اللہ علیہ وآلہ وسلم) نے گمشدہ اونٹ کو پکڑنے سے منع فرمایا اور چھوڑ دینے کا حکم دیا۔ یہ دلیل ہے کہ گمشدہ چیز کو لینا حرام ہے۔ اس کی حرمت پر تو روایت میں کوئی دلیل نہیں بلکہ اس میں جناب رسول اللہ (صلی اللہ علیہ وآلہ وسلم) نے صرف گمشدہ اونٹ کو چھوڑنے کا حکم فرمایا ہے اور وہ اس لیے دیا کہ اونٹ پانی کی تلاش پر قدرت رکھتا ہے اور چارہ بھی کھا سکتا ہے اس کے ضائع ہونے کا خطرہ ندارد کے برابر ہے کیونکہ وہ پانی پر جاتا اور درخت چرتا ہے یہاں تک کہ اپنے مالک تک پہنچ جائے پس اس کو پکڑنے سے چھوڑ دینا افضل ہے۔ اگر کوئی شخص اسے مالک کے لیے حفاظت کی خاطر پکڑ لے تو اس پر کچھ گناہ نہیں ہے جناب رسول اللہ (صلی اللہ علیہ وآلہ وسلم) سے گمشدہ بکری کے متعلق سوال کیا گیا تو آپ نے فرمایا وہ تیرے لیے یا تیرے بھائی یا بھیڑئے کے لیے ہے۔ یعنی اسے پکڑ لو پس تمہارے پاس تمہارے بھائی کے لیے محفوظ رہے گی اور چھوڑنے کی صورت میں بھیڑیا پکڑ کر کھاجائے گا یا پھر اس کا مالک خود پالے اور پکڑ لے۔ تو اس کو پکڑنے کی اجازت مرحمت فرمائی گئی ہے اور یہ روایت ابن عمرو بن عاص (رض) میں بھی موجود ہے ملاحظہ ہو۔
تخریج : بخاری فی العلم باب ٢٨‘ الماسقاۃ باب ١٢‘ واللقطہ باب ٢؍٣‘ ٤؍٩‘ مسلم فی الاقطہ ١؍٢‘ ٥‘ ابو داؤد فی اللقطہ باب ١‘ ترمذی فی الاحکام باب ٣٥‘ ابن ماجہ فی للقطہ باب ١‘ مالک فی الاقضیہ ٤٦‘ مسند احمد ٢‘ ١٨٠؍١٨٦۔