٦٠٤٧: عروہ بن زبیر نے حضرت عائشہ (رض) سے روایت کی ہے ام سنبلہ اسلمیہ (رض) آئی اس کے ساتھ دودھ کی ایک مشک تھی وہ جناب رسول اللہ (صلی اللہ علیہ وآلہ وسلم) کی خدمت میں بطور ہدیہ پیش کر رہی تھی اس نے وہ دودھ میرے پاس رکھ دیا اس کے پاس ایک پیالہ بھی تھا۔ اسی وقت حضور (صلی اللہ علیہ وآلہ وسلم) تشریف لے آئے اور آپ نے فرمایا ام سنبلہ کو ! مرحبا اور اھلاً و سھلاً ۔ اس نے عرض کی میرے ماں باپ آپ پر قربان ہوں میں آپ کے لیے دودھ کی ایک مشک ہدیہ کے طور پر لائی ہوں آپ نے فرمایا بارک اللہ علیک۔ اللہ تمہیں برکت دے۔ اس پیالے میں میرے لیے دودھ ڈالو۔ جب اس نے پیالے میں ڈال دیا اور آپ نے دست اقدس میں پکڑ لیا تو میں نے کہا آپ نے تو فرمایا تھا میں کسی اعرابی کا ہدیہ قبول نہ کروں گا۔
آپ نے فرمایا قبیلہ اسلم کے اعراب وہ عام اعراب نہیں وہ تو ہمارے جنگل کے لوگ ہیں اور ہم ان کے شہری ہیں جب ہم ان کو بلاتے ہیں تو وہ فوراً آجاتے ہیں اور جب وہ ہمیں بلاتے ہیں تو ہم ان کی معاونت کرتے ہیں پھر آپ نے وہ دودھ نوش فرمایا۔
تخریج : مسند احمد ٦؍١٣٣‘ بنحوہ۔