٦٠٩: عروہ بیان کرتے ہیں کہ اسماء بنت عمیس (رض) کہتی ہیں کہ میں نے عرض کی یارسول اللہ (صلی اللہ علیہ وآلہ وسلم) فاطمہ بنت ابی حبیش اتنے عرصہ سے استحاضہ کی تکلیف میں ہے اور اس نے نماز نہیں پڑھی آپ نے فرمایا عجیب بات ہے یہ شیطانی حرکت ہے اسے ٹب میں بیٹھنا چاہیے جب پانی پر زردی کا غلبہ پائے یعنی خون کے اثرات نہ رہیں تو ظہر و عصر کے لیے ایک غسل کرے پھر مغرب و عشاء کے لیے ایک غسل کرے اور ان کے مابین وضو کرے۔ اس میں احتمال یہ ہے کہ وہ ان احداث میں جو طہارت کو توڑنے والی ہیں ان سے بھی وضو کرے اور یہ بھی احتمال ہے کہ وہ صبح کے لیے وضو کرے۔ آثار متقدمہ میں جو بات گزری اس کے خلاف کچھ بھی دلیل نہیں جن کو شعبہ و سفیان نے نقل کیا ہے۔ وہ فرماتے ہیں یہ آثار جناب رسول اللہ (صلی اللہ علیہ وآلہ وسلم) سے اسی طرح مروی ہیں جیسا کہ ہم نے ذکر کیا کہ ایک غسل میں ظہر و عصر اور ایک میں مغرب و عشاء کو جمع کرے اور صبح کے لیے ایک غسل کرے۔ ہم اس کو اختیار کرتے ہیں اور یہ قول پہلے آثار میں منقول بات سے اولیٰ ہیں جن میں ہر نماز کے لیے غسل کا حکم ہے کیونکہ یہ روایات سے ثابت ہوچکا کہ یہ پہلی روایات کو منسوخ کرنے والی ہے۔ ناسخ روایات ملاحظہ ہوں۔
تخریج : ابو داؤد باب ١١١‘ ٢٩٦‘ ١؍٤١‘ المعجم الکبیر ٢٤؍١٣٩
تتوضأ فیما بین ذلک کے متعلق دو احتمال ہیں کہ اگر دونوں نمازوں کے درمیان حدث لاحق ہوجائے تو اس کے لیے وضو کرے اور فجر کے لیے غسل کرے۔
نمبر ٢: فجر کی نماز کے لیے غسل کی بجائے وضو کرے۔
ان میں پہلا احتمال متعین کی طرح ہے کیونکہ وہ شعبہ اور سفیان کی روایت میں صاف مذکور ہے۔
خلاصہ روایات :
یہ چاروں آثار اس بات پر دلالت کرتے ہیں کہ پانچوں نمازوں کے لیے تین مرتبہ غسل کرنا پڑے گا۔
امام طحاوی (رح) فرماتے ہیں :
ان آثار کو اختیار کرنا پہلے آثار پر عمل سے اولیٰ ہے کیونکہ وہ پہلے حکم تھا پھر یہ حکم اتارا گیا اس نسخ کے لیے واضح دلالالت قائم ہیں۔