٦١٤٥: حارث بن یعقوب نے یزید بن ابی یزید مولا انصار سے روایت کی پھر انھوں نے اپنی اسناد سے اسی طرح روایت نقل کی۔ امام طحاوی (رح) کہتے ہیں : کہ ان آثار سے معلوم ہوتا ہے کہ تین دن سے زیادہ قربانی کا گوشت کھانے کی ممانعت منسوخ ہوچکی۔ تم نے علی (رض) سے نقل کیا ہے کہ جناب نبی اکرم (صلی اللہ علیہ وآلہ وسلم) نے قربانی کے گوشت کو ممانعت کے بعد حلال قرار دیا ہے اس سے یہ بات ثابت ہوئی کہ آپ نے منع تو کیا تھا اس کے بعد کہ اس کو جائز قرار دیا تاکہ روایات کے معانی درست ہو سکیں اور ان میں تضاد نہ ہو۔ ان کو جواب میں کہے کہ جو کچھ آپ نے ذکر کیا اس میں آپ کے مؤقف کی کوئی دلیل نہیں اس لیے ممکن ہے کہ جناب رسول اللہ (صلی اللہ علیہ وآلہ وسلم) نے تین دن سے زیادہ قربانی کا گوشت رکھنے سے اس لیے منع کیا ہو کہ لوگوں پر تنگدستی ہے پھر وہ تنگدستی ختم ہوگئی تو ان کے لیے مباح کردیا پھر دوبارہ لوٹ آئی جس وقت علی المرتضیٰ (رض) نے خطبہ دیا تو انھوں نے لوگوں کو وہی بات فرمائی۔ جس کا جناب رسول اللہ (صلی اللہ علیہ وآلہ وسلم) نے ایسے حالات میں حکم دیا تھا اور اس کی دلیل ابن مرزوق کی یہ روایت ہے۔