٦١٥٠: عمرہ نے حضرت عائشہ (رض) سے روایت کی وہ فرماتی ہیں کہ ہم قربانیوں کے گوشت نمکین کرتے اور مدینہ کی طرف لوگوں کے پاس بھیجتے تو آپ نے فرمایا اس کو تین دن تک کھاؤ آپ کا یہ حکم لزوم کے لیے نہیں تھا بلکہ آپ کا مقصد یہ تھا کہ دوسروں کو بھی اس سے کھلائیں۔ اب قربانی کے گوشت کی تین دن سے زیادہ کھانے کی ممانعت دو صورتوں سے خالی نہیں۔ صدقہ اور خیرات پر آمادہ کرنا مقصود تھا اگر یہ صدقہ پر ابھارنا مان لیا جائے تو ممانعت تحریم کے لیے نہ ہوگی اس سے خود یہ ثابت ہوگیا قربانی کا گوشت تین دن کے بعد کھانے اور جمع کرنے میں کوئی حرج نہیں۔ اور اگر یہ ممانعت تحریم کے لیے ہو تو یہ حکم منسوخ ہوگیا تو پھر آپ نے ایسا حکم دیا جس نے اس کے حلال ہونے کو لازم کردیا تو ان صورت سے یہ بات ثابت ہوگئی کہ قربانی کا گوشت تین دن سے زیادہ کھانا اور جمع کرنا دونوں جائز ہیں اور یہی امام ابوحنیفہ ‘ ابو یوسف اور محمد رحمہم اللہ کا قول ہے۔
تخریج : بخاری فی الاضاحی باب ١٦۔
امام طحاوی (رح) کہتے ہیں : کچھ لوگوں کا خیال ہے کہ بجو کا گوشت کھانا مباح ہے اور انھوں نے ابن ابی عمارہ کی روایت کو دلیل بنایا کہ جناب رسول اللہ (صلی اللہ علیہ وآلہ وسلم) نے فرمایا کہ یہ شکار ہے اسی طرح دوسری دلیل حضرت جابر (رض) کی روایت ہے جس کے قریباً یہی الفاظ ہیں اور یہ الفاظ بھی زائد ہیں اس روایت کو ہم کتاب مناسک حج میں ذکر کرچکے ہیں۔ فریق ثانی کا کہنا ہے کہ بجو کا گوشت نہ کھایا جائے گا ان کی دلیل یہی حدیث جابر (رض) ہے جو مختلف الفاظ کے ساتھ مروی ہے ابن جریج نے اس کے خلاف اس کو روایت کیا ہے انھوں نے بیان کیا کہ ابن ابی عمار (رض) نے جابر (رض) سے بچو کے بارے میں پوچھا تو انھوں نے فرمایا کیا یہ کوئی شکار ہے تو ابن ابی عمار نے کہا ہاں تو جابر نے کہا کیا تم نے یہ بات نبی اکرم (صلی اللہ علیہ وآلہ وسلم) سے سنی ہے تو انھوں نے کہا۔ جی ہاں۔
حاصل روایات : یہ روایت بتاتی ہے کہ ابن عمار نے نبی اکرم (صلی اللہ علیہ وآلہ وسلم) سے صرف یہ خبر دی ہے کہ وہ شکار ہے اور ہر شکار تو نہیں کھایا جاتا پس یہ اضافہ جو حدیث ابن جریج میں پایا جاتا ہے تو اس میں یہ احتمال ہوا کہ یہ جابر (رض) کا قول ہو کہ انھوں نے جناب نبی اکرم (صلی اللہ علیہ وآلہ وسلم) سے سنا کہ آپ کو اس کو صید کہا اور دوسرا احتمال یہ ہے کہ یہ نبی اکرم (صلی اللہ علیہ وآلہ وسلم) کا ارشاد ہو اب اس احتمال کے بعد آپ کی یہ سنت متواترہ پائی گئی۔ کہ آپ (صلی اللہ علیہ وآلہ وسلم) نے ہر کچلیوں والے درندے کے کھانے سے منع کیا ہے اور بجو کچلیوں والا ہے آپ اس میں کسی کو مستثنیٰ نہیں اور یہ تو ہم جان چکے کہ یہ یقیناً اس میں داخل ہے مگر اس کا مستثنیٰ ہو کر خارج ہونا یقینی طور پر معلوم نہیں۔