٦٢٠٥: ابو نصرہ نے ابو سعید خدری (رض) سے روایت کی ہے کہ ایک دیہاتی جناب نبی اکرم (صلی اللہ علیہ وآلہ وسلم) سے پوچھا کہ میرے باغ میں بہت سے گوہ ہیں اور وہ ہمارے گھر والوں کی خوراک بھی ہیں آپ نے اس پر خاموشی اختیار فرمائی ہم نے اسے کہا یہ بات دوبارہ دہراؤ اس نے دوبارہ دہرائی آپ پھر بھی خاموش رہے پھر ہم نے اسے کہا دوبارہ دہراؤ اس نے دوبارہ دہرایا تو آپ (صلی اللہ علیہ وآلہ وسلم) نے فرمایا اللہ تعالیٰ نے بنی اسرائیل کے ایک خاندان پر ناراضگی فرمائی ان کو مسخ کر کے زمین پر چلنے والے جاندار بنادیا میرے گمان میں یہ وہی ہیں میں نہ ان کو کھانے والا ہوں اور نہ ہی ان کو حرام قرار دینے والا ہوں۔
تخریج : مسلم فی الصید روایت ٥١۔
امام طحاوی (رح) کہتے ہیں : کہ یہ حدیث بتارہی ہے جناب رسول اللہ (صلی اللہ علیہ وآلہ وسلم) نے گوہ کو حرام قرار نہیں دیا اس بات کے باوجود کہ مسخ شدہ امت کا اس میں خطرہ تھا اب ہم اس بات پر غور کرنا چاہتے ہیں کہ جناب نبی اکرم (صلی اللہ علیہ وآلہ وسلم) سے کوئی ایسی چیز منقول ہے جو اس کے مسخ شدہ نہ ہونے کی نفی کرے۔