٦٢٤: ثابت و قتادہ وحمید نے انس (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت نقل کی ہے اور من البانھا وابوالھا کے دونوں لفظ لائے ہیں۔ بعض علماء کا یہ مذہب ہے کہ جن جانوروں کا گوشت کھایا جاتا ہے ان کا پیشاب پاک ہے اور اس کا حکم ان کے گوشت والا ہے یہ امام محمد بن الحسن کا قول ہے۔ ان کی دلیل یہ ہے کہ جب جناب رسول اللہ (صلی اللہ علیہ وآلہ وسلم) نے ان کی دوائی کے طور پر اس کو تجویز فرمایا تو اس سے اس کا حلال ہونا ثابت ہوگیا کیونکہ اگر یہ حرام ہوتا تو آپ ان کے علاج کے لیے تجویز نہ فرماتے کیونکہ حرام تو بیماری ہے ‘ شفاء نہیں۔ جیسے علقمہ بن وائل کی روایت میں صاف وارد ہے۔
حاصل روایات :
امام محمد (رح) و دیگر علماء کہتے ہیں ان روایات میں جناب رسول اللہ (صلی اللہ علیہ وآلہ وسلم) نے ان کو جب ابوال پینے کا حکم دیا تو اس سے اس کا حلال ہونا ثابت ہوا اور اگر یہ حلال نہ ہوتا تو ان کو تداوی کی اجازت نہ دی جاتی کیونکہ حرام میں شفاء نہیں بلکہ وہ خود بیماری ہے پس ثابت ہوا کہ پیشاب ماکول اللحم پاک ہے تبھی استعمال کا حکم دیا ورنہ تو حرام سے تداوی کی کسی صورت اجازت نہیں اس کی دلیل یہ روایات ہیں۔