٦٢٥٤: عمرو خبر دیتے ہیں کہ میں نے جابر بن زید کو یہ کہا کہ لوگوں کا خیال یہ ہے کہ نبی اکرم (صلی اللہ علیہ وآلہ وسلم) نے گھریلو گدھوں کے گوشت سے منع فرمایا ہے تو وہ کہنے لگے کہ یہی بات حضرت حکم بن عمرو غفاری (رض) پیغمبر (علیہ الصلوۃ والسلام) سے بیان کرتے تھے لیکن بڑے عالم عبداللہ ابن عباس (رض) نے اس کا انکار کیا اور دلیل میں یہ آیت پڑھی ہے ” قل لا اجد فی ما اوحی الی “ (الانعام : ١٤٥) یعنی مجھ پر جو وحی آتی ہے میں اس میں کوئی چیز بھی کسی کھانے والے پر حرام نہیں پاتا سوائے ان چیزوں کے۔