٦٢٧٧: صالح بن یحییٰ بن مقدام نے اپنے والد اپنے دادا سے انھوں نے حضرت خالد بن ولید (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے گھوڑے کے گوشت سے اور خچر اور گدھوں کے گوشت سے منع فرمایا۔ امام طحاوی (رح) فرماتے ہیں : بعض لوگوں نے اس روایت کو اختیار کیا ہے امام ابوحنیفہ (رح) کا یہ قول ہے اور یہ حدیث ان کی دلیل ہے۔ فریق ثانی نے ان کی مخالفت کی ہے اور کہا ہے کہ گھوڑے کا گوشت کھانے میں کوئی حرج نہیں۔ انھوں نے ان روایات سے استدلال کیا ہے۔
تخریج : ابو داؤد فی الاطعمہ باب ٢٥‘ نسائی فی الصید باب ٣٠‘ ابن ماجہ فی الذبائح باب ١٤‘ مسند احمد ٣؍٣٥٦‘ ٤؍٨٩۔
گھوڑے کے گوشت کے متعلق امام ابوحنیفہ (رح) ممانعت کے قائل ہیں۔ فریق ثانی کا قول یہ ہے کہ گھوڑے کے گوشت میں کچھ قباحت نہیں۔ گدھے اور گھوڑے کا حکم مختلف ہے اس کو گدھے پر قیاس نہ کیا جائے گا۔