٦٢٨٠: عروہ نے اپنی بیوی فاطمہ بنت منذر سے انھوں نے اسماء بنت ابی بکر (رض) سے وہ کہتی ہیں کہ ہم نے جناب رسول اللہ (صلی اللہ علیہ وآلہ وسلم) کے زمانہ میں ایک گھوڑا ذبح کیا اور اس میں سے کھایا۔ اس باب کے آثار : باب النہی عن لحوم الحمر الاھلیہ میں ذکر کردیئے گئے۔ یہاں اعادہ کی ضرورت نہیں۔ فریق ثانی نے ان آثار کو اختیار کیا اور انھوں نے گھوڑے کے گوشت کو کھانے کی اجازت دی یہ امام ابو یوسف (رح) اور محمد (رح) کا قول ہے۔ انھوں نے اپنا یہ قول متواتر روایات سے اخذ کیا ہے۔ اگر اس میں قیاس کا دخل ہوتا تو گھریلو گھوڑے اور گھریلو گدھے کے گوشت میں چنداں فرق نہ ہوتا۔ لیکن جب جناب رسول اللہ (صلی اللہ علیہ وآلہ وسلم) سے آثار تواتر کے ساتھ وارد ہیں تو ان کو اختیار کرنا لازم ہے۔ خاص طور پر حضرت جابر (رض) والی روایت جس میں یہ فرمایا گیا ہے کہ جناب رسول اللہ (صلی اللہ علیہ وآلہ وسلم) نے گھوڑے کے گوشت کو مباح قرار دیا اور گدھوں کے گوشت کی ممانعت فرمائی۔ پس اس سے ان دونوں کے گوشت کا مختلف ہونا بھی واضح طور پر معلوم ہوگیا۔
تخریج : بخاری فی الذبائح باب ٢٧‘ مسلم فی الصید ٢٩؍٣٠‘ ابن ماجہ فی الذبائح باب ١٢‘ نسائی فی الضحایا باب ٢٣‘ مسند احمد ٦؍٣٤٦۔