٦٣٢: قتادہ بیان کرتے ہیں کہ انس (رض) نقل کرتے ہیں کہ حضرت زبیر اور عبدالرحمن بن عوف نے جناب نبی اکرم (صلی اللہ علیہ وآلہ وسلم) کی خدمت میں جو وں کی شکایت کی تو آپ نے ان کو ریشمی کپڑے کے استعمال کی اس غزوہ میں اجازت مرحمت فرمائی۔ حضرت انس (رض) روایت کرتے ہیں کہ میں نے خود ان میں سے ہر ایک کو ریشمی قمیص پہنے دیکھا۔ یہ اللہ کے رسول (صلی اللہ علیہ وآلہ وسلم) ہیں۔ جنہوں نے ریشم کو ان لوگوں کے لیے پہننا مباح کردیا جن کو خارش کی تکلیف تھی اور یہ ان کے لیے بطور علاج تھا۔ ان کے لیے مباح کرنے میں کوئی ایسی وجہ نہیں تھی کہ جو اس بات کا ثبوت بن سکے کہ یہ کسی اور بیماری میں بھی مباح ہے۔ بالکل اسی طرح جن وجوہ کی بناء پر عرنیین کے لیے آپ نے پیشاب کو مباح قرار دیا۔ وہ وجوہ انہی میں پائی جاتی تھیں ‘ ان کے لیے مباح کرنے میں کوئی ایسی دلیل نہیں جس سے ان اسباب کے علاوہ میں بھی اس کو مباح قرار دیا جائے اور ریشم کے پہننے کی حرمت میں کوئی ایسی چیز نہیں جو اس بات کے منافی ہو کہ وہ ضرورت کی حالت میں حلال ہے اور نہ ہی یہ موجود ہے کہ وہ بعض اسباب میں علاج ہے۔ بعینہٖ پیشاب کی حرمت ضرورت کے احوال کے علاوہ یہی حکم رکھتی ہے اس میں بھی کوئی ایسی دلیل نہیں کہ جس سے اس کا ضرورت کی حالت میں حرام ہونا ثابت ہو۔ پس اس سے یہ بات ثابت ہوگئی کہ شراب کے متعلق آپ (صلی اللہ علیہ وآلہ وسلم) کا یہ ارشاد کہ یہ بیماری ہے شفا نہیں۔ وہ اس بناء پر ہے کہ وہ لوگ اس کو ذریعہ شفاء سمجھتے تھے اور کیونکہ وہ نشے والی ہے اور نشہ حرام ہے اور حضرت عبداللہ (رض) کے قول کا بھی ہمارے نزدیک یہی معنی ہے کہ اللہ تعالیٰ نے اس چیز میں تمہاری شفا مقرر نہیں کی جو حرام ہو۔ اسی بنیاد پر کہ وہ شراب کو شفا کا ذریعہ سمجھتے تھے اور بڑا محترم قرار دیتے تھے اور اس کو ذاتی لحاظ سے شفا دینے والی سمجھتے تھے آپ نے ان کو فرمایا کہ اللہ جل جلالہ نے تمہاری شفا اس میں مقرر نہیں کی جس کو تم پر حرام کردیا ہو۔ ان آثار کی یہی صورتیں بنتی ہیں جب مذکورہ احتمال اس میں موجود ہے تو پیشاب کی طہارت کی دلیل نہ رہی۔ پس ہمیں اس بات کی ضرورت پیش آئی کہ ہم غور و فکر کر کے اس بات کو تلاش کریں تاکہ ہمارے سامنے اس کا حکم ظاہر ہوجائے۔ چنانچہ ہم نے غور کیا تو اولاد آدم کے گوشت کو بالاتفاق پاک پایا اور ان کے بول کو حرام و نجس پایا اور ان کے پیشاب کا حکم بالاتفاق ان کے خون والا ہے نہ کہ گوشت والا۔ پس غور و فکر کا تقاضا یہی ہے کہ اونٹوں کے پیشاب کا بھی یہی حکم ہونا چاہیے جو ان کے خون کا حکم ہے نہ وہ جو ان کے گوشت کا حکم ہے پس ہماری مذکورہ بات سے یہ ثابت ہوگیا کہ اونٹوں کا پیشاب نجس و پلید ہے۔ نظر کا تقاضا بھی یہی ہے اور امام ابوحنیفہ (رح) کا قول بھی یہی ہے ‘ متقدمین کا اس سلسلے میں اختلاف ہے جو مندرجہ ذیل روایات سے ظاہر ہوگا۔
تخریج : بخاری فی العباس باب ٢٩‘ مسلم فی اللبس والزینۃ روایت ٢٤‘ ابن ماجہ فی الطب باب ١٧‘ نمبر ٣٥٩٢‘ مصنف ابن ابی شیبہ کتاب العقیقہ ٨؍١٦٧۔
حضرت انس (رض) کا بیان ہے کہ میں نے خود ان کو ریشمی قمیص زیب تن کئے دیکھا اسی طرح جناب رسول اللہ (صلی اللہ علیہ وآلہ وسلم) نے مردوں میں خارش والے کے لیے بھی ریشم کو مباح قرار دیا اور یہ مباح کرنا بطور علاج ہے اس میں اس بات کی قطعاً گنجائش نہیں ہے کہ یہ اس بیماری کے علاوہ ویسے مباح ہوجائے۔
بالکل اسی طرح جناب رسول اللہ (صلی اللہ علیہ وآلہ وسلم) نے عرنیین کی بیماری کی وجہ سے ابوال کے استعمال کی ان کو اجازت دی اس میں قطعاً اس بات کی دلیل نہیں کہ اس مرض کے علاوہ بھی ان کے لیے یہ حلال ہوگیا اور ریشم پہننے کی حرمت میں کوئی ایسی چیز نہیں جو اس بات کی نفی کرے کہ یہ ضرورت کے لیے بھی حلال نہیں ہے اور بعض بیماریوں کے علاج میں استعمال کی نفی کرے۔
اسی طرح پیشاب کی بلاضرورت حرمت میں اس بات کی کوئی دلیل نہیں کہ وہ حالت ضرورت میں بھی حرام ہے۔
روایت نمبر ٢: انہ داء لیس بشفائ “ کا مطلب یہ ہے کہ کفار عرب زمانہ جاہلیت میں شراب سے شفاء حاصل کرتے تھے کیونکہ وہ شراب ہے اس کی عظمت کو دلوں سے مکمل طور پر مٹانے کے لیے یہ بات فرمائی کہ اس میں بالکل شفاء نہیں بلکہ یہ باعث مرض ہے۔ باقی باعث شفاء نہ ہونے کا یہ مطلب نہیں کہ کسی مرض میں ضرورۃ اس کا استعمال درست نہ ہو۔
روایت نمبر ٣: ابن عباس (رض) ابوال الابل والبانھا شفاء لضرب بطونہم ابوال ابل میں فساد معدہ کے لیے شفاء ہے اس روایت کو پیشاب کے پاک ہونے کے لیے پیش کرنا درست نہیں کیونکہ کسی چیز کا باعث شفاء ہونا اس کے نہ پاک ہونے کی دلیل ہے اور نہ حلال ہونے کی۔
نظر طحاوی (رح) :
ان تمام آثار میں ان جہات کی وضاحت سے معلوم ہوگیا کہ طہارت ابوال پر کوئی واضح دلیل موجود نہیں تو ہمیں فکر کو دوڑانے کی حاجت ہوئی تاکہ عقلی نظائر سے اس کا حکم معلوم کرلیں چنانچہ ہم نے غور کیا کہ انسانوں کا گوشت بالاتفاق پاک ہے اور ان کے ابوال (پیشاب) بالاتفاق حرام اور نجس ہیں تو گویا ان کے ابوال کو خون کا حکم ملا ہے گوشت کا نہیں۔
اسی طرح اونٹ کے ابوال کو خون کا حکم دیا گیا نہ کہ گوشت کا پس اس سے ثابت ہوا کہ اونٹ کا پیشاب نجس ہے۔ یہی امام ابوحنیفہ (رح) کا قول ہے۔
حرام اشیاء سے تداوی کا حکم :
اس میں نمبر ایک امام ابوحنیفہ (رح) شافعی (رح) کے ہاں مطلق طور پر حرام سے علاج ناجائز ہے۔ نمبردو امام مالک و ابو یوسف (رح) کے ہاں حرام سے علاج درست ہے امام طحاوی (رح) شراب کے علاوہ سے علاج کو درست مانتے ہیں۔
فقہاء کے اس اختلاف کی وجہ تابعین (رح) کے اقوال کا اختلاف ہے۔