٦٤٦١: یونس نے ابن وہب سے بیان کیا کہ میں نے امام مالک کو یہ بات کہتے سنا۔ اب ہم حدیث ابی قتادہ کی طرف دوبارہ رجوع کرتے ہیں کہ انھوں نے جناب نبی اکرم (صلی اللہ علیہ وآلہ وسلم) کو قبلہ رخ کر کے پیشاب کرتے دیکھا تو ممکن ہے کہ انھوں نے اسی جگہ دیکھا ہو جہاں ابن عمر (رض) نے دیکھا تو ان کی روایت کا بھی وہی مفہوم ہوا جو روایت ابن عمر (رض) کا ہے اور یہ بھی ممکن ہے کہ انھوں نے صحرا میں دیکھا ہو تو یہ روایت ابن عمر (رض) کی روایت کے خلاف ہوئی۔ یہ پہلی احادیث کے لیے ناسخ بن جائے گی حالانکہ ہمارے نزدیک یہ اس کی ناسخ نہیں ہے جب تک کہ یقین سے یہ معلوم نہ ہوجائے کہ اس نے اس کو منسوخ کردیا۔ پھر حدیث جابر۔ تو اس میں جناب نبی اکرم (صلی اللہ علیہ وآلہ وسلم) نے قبلہ کی طرف قضائے حاجت میں منہ اور پیٹھ کرنے سے منع فرمایا لیکن ہمارے لیے جگہ کی وضاحت نہیں فرمائی۔ پس اس میں ایک احتمال یہ ہے کہ اس سے مراد وہی ہو جو ہم نے پیچھے حدیث ابو ایوب کے بارے میں بیان کردیا۔ تو اس صورت میں کوئی ایسی دلیل نہیں پائی جاتی جو اس کو حدیث ابن عمر (رض) اور حدیث ابو قتادہ (رض) سے متضاد ثابت کرے۔ جابر (رض) کہتے ہیں کہ میں نے رسول اللہ (صلی اللہ علیہ وآلہ وسلم) کو قبلہ کی طرف رخ کر کے پیشاب کرتے دیکھا۔ پس اس میں یہ احتمال ہے کہ یہ پیشاب کرنا ایسے مقام میں تھا جس کی ممانعت پہلی بار آپ نے نہیں فرمائی۔ پس ان آثار میں کوئی چیز ہمیں ایسی معلوم نہ ہوئی جس نے کسی دوسری روایت کو منسوخ کیا ہو۔ اب ہم حدیث عراک کی طرف رجوع کرتے ہیں کہ اس میں آپ کے سامنے ایسے لوگوں کا ذکر کیا گیا جو اپنی شرمگاہوں کا رخ قبلہ کی طرف کرنے کو ناپسند کرتے ہیں۔ جناب رسول اللہ (صلی اللہ علیہ وآلہ وسلم) نے فرمایا کہ میرے بیت الخلاء کا رخ قبلہ کی طرف پھیر دو تو اب اس روایت میں یہ درست ہے کہ آپ (صلی اللہ علیہ وآلہ وسلم) نے ان کی بات کا انکار کیا ہو کیونکہ ان لوگوں نے اس کو تمام مقامات کے لیے خیال کیا تو آپ (صلی اللہ علیہ وآلہ وسلم) نے اپنے بیت الخلاء کے بدلنے کا حکم دیا تاکہ ان کی تردید ہوجائے اور ان کو معلوم ہوجائے کہ ممانعت ہر جگہ کے لیے نہیں۔ قبلہ رخ کرنے کی ممانعت بعض مقامات میں ہے اور بعض میں نہیں اور یہ بھی احتمال ہے کہ تمام مقامات میں جو ممانعت تھی وہ منسوخ ہوگئی کیونکہ پہلے آثار میں ممانعت موجود ہے۔ پس اس روایت میں کوئی نسخ اور غیر نسخ کی دلیل نہیں۔ جب ان آثار کا معاملہ اسی طرح ہے جیسا کہ ہم نے ذکر کیا تو اب زیادہ بہتر یہی ہے کہ ان تمام کو ہم صحیح قرار دیں ممانعت والی روایات کو صحرا پر محمول کریں اور اباحت والی روایات کو گھروں پر محمول کریں تاکہ ان میں کوئی روایت ایک دوسرے سے متضاد نہ رہے۔
امام شعبی (رض) کے قول سے اس بات کی تائید :