٦٨٢٦: عبداللہ بن عبداللہ نے جابر بن عتیق سے روایت کی وہ بتاتے ہیں کہ جناب رسول اللہ (صلی اللہ علیہ وآلہ وسلم) عبداللہ بن ثابت کی تیمارداری کے لیے آئے ان پر بیماری کا غلبہ دیکھا آپ نے ان کو آواز دی مگر انھوں نے جواب نہ دیا پھر جناب رسول اللہ (صلی اللہ علیہ وآلہ وسلم) نے اناللہ پڑھی اور فرمایا اے ابوالربیع ہم تیرے معاملے میں مغلوب کردیئے گئے عورتوں نے چیخنا اور رونا شروع کردیا ابن عتیق ان کو خاموش کرنے لگے تو جناب رسول اللہ (صلی اللہ علیہ وآلہ وسلم) نے فرمایا ان کو چھوڑ دو جب واجب ہوجائے تو کوئی رونے والی نہ روئے انھوں نے کہا یارسول اللہ (صلی اللہ علیہ وآلہ وسلم) واجب ہونا کیا ہے فرمایا موت کا آنا۔ امام طحاوی (رح) کہتے ہیں کہ میت پر رونا مکروہ ہے بعض لوگوں کا یہ خیال ہے اور انھوں نے اسی روایت کو دلیل بنایا اور دوسری وہ روایت کہ میت کو اس کے گھر والوں کے رونے سے عذاب ہوتا ہے۔
تخریج : ابو داؤد فی الجنائز باب ١١‘ نسائی فی الجنائز باب ١٤۔
خلاصہ الزام :
اہل میت کا اس پر بلابین رونا بھی مکروہ ہے اس لیے کہ میت پر رونے سے اس کو عذاب ہوتا ہے۔
فریق ثانی : میت پر رونے میں کچھ حرج نہیں بشرطیکہ زبان سے فحش کلمات جو اللہ تعالیٰ کی نافرمانی پر مشتمل ہوں اور نوحہ وغیرہ نہ کیا جائے۔