٦٨٣: الدر اور دی نے عمرو بن ابی عمرو بن عکرمہ سے روایت کی ہے کہ جناب ابن عباس (رض) سے غسل جمعہ کے سلسلہ میں دریافت کیا گیا کہ آیا وہ واجب ہے یا نہیں۔ تو انھوں نے فرمایا نہیں لیکن وہ پاکیزگی اور بہت بہتر ہے پس جس نے غسل کیا اس نے خوب کیا اور جس نے غسل نہ کیا اس پر ضروری نہیں میں تمہیں اس کی ابتداء کا سلسلہ ذکر کرتا ہوں لوگ محنت و مزدوری کرتے اون کے کپڑے عموماً استعمال کرتے اور اپنی پشتوں پر بوجھ اٹھاتے مسجد نبوی کی چھت نیچی اور نمازیوں کے لیے مسجد چھوٹی تھی بس وہ ایک چھپر کی صورت میں تھی جناب رسول اللہ (صلی اللہ علیہ وآلہ وسلم) سخت گرمی کے ایک دن میں تشریف لائے لوگ اس اون میں پسینے سے شرابور تھے گندی ہوا اٹھی جس سے ایک دوسرے کو ایذاء پہنچی جناب رسول اللہ (صلی اللہ علیہ وآلہ وسلم) نے اس ریاح کو محسوس فرمایا تو آپ نے فرمایا اے لوگو ! جب یہ دن آئے تو غسل کرلیا کرو اور ہر ایک تم میں جو اچھی خوشبو اور تیل پائے وہ اس کو لگائے (اور مسجد میں آئے) ابن عباس (رض) کہنے لگے پھر اللہ تعالیٰ وسعت لے آئے اور انھوں نے اون کے علاوہ دوسرے کپڑے پہن لیے اور محنت و مزدوری بھی کم ہوگئی اور مسجد بھی وسیع ہوگئی۔ یہ حضرت ابن عباس (رض) فرماتے ہیں کہ جناب رسول اللہ (صلی اللہ علیہ وآلہ وسلم) سے منقول روایات میں غسل وجوب کے لیے نہ تھا بلکہ یہ بعض اسباب کی بناء پر تھا پھر وہ اسباب جاتے رہے تو تاکید غسل بھی جاتی رہی۔ وہ جناب رسول اللہ (صلی اللہ علیہ وآلہ وسلم) سے روایات کرنے والوں میں سے ایک ہیں کہ آپ (صلی اللہ علیہ وآلہ وسلم) غسل کا حکم دیتے تھے اور حضرت عائشہ صدیقہ (رض) سے بھی اس سلسلہ میں کچھ مروی ہے۔
تخریج : ابو داؤد فی الطھارۃ باب ١٢٨‘ نمبر ٣٥٣۔
طحاوی (رح) فرماتے ہیں کہ یہ ابن عباس (رض) جو غسل کے حکم کی نوعیت بتلا رہے ہیں اور یہ بتلا رہے ہیں کہ یہ حکم وجوب کے لیے نہ تھا بلکہ اس کا یہ سبب تھا جب علت نہ رہی تو وجوب نہ رہا۔
فریق اوّل کی مستدل روایات میں یہ بھی ان حضرات میں شامل ہیں جنہوں نے امر غسل کا تذکرہ فرمایا ہے اب ان کا فتویٰ اس کے خلاف خود اس کے نسخ کی دلیل ہے۔ فتدبر۔
روایت حضرت عائشہ k
حضرت عائشہ صدیقہ (رض) سے بھی اس سلسلہ میں روایت وارد ہے۔