٦٨٣٦: علی بن ربیعہ کہتے ہیں کہ قرظہ بن کعب پر نوحہ کیا گیا۔ تو حضرت مغیرہ بن شعبہ (رض) نے خطبہ دیا اور فرمایا۔ اس امت میں نوحہ کا کیا جواز ہے ؟ بیشک میں نے جناب رسول اللہ (صلی اللہ علیہ وآلہ وسلم) کو فرماتے سنا۔ مجھ پر جھوٹ بولنا وہ تمہارے ایک دوسرے پر جھوٹ بولنے کی طرح نہیں۔ جس نے مجھ پر جان بوجھ کر جھوٹ بولا وہ اپنا ٹھکانا آگ بنا لے۔ اور جس پر نوحہ کیا جائے تو اس کو نوحہ کی وجہ سے عذاب ہوگا یا فرمایا اس وجہ سے عذاب ہوگا کہ اس پر نوحہ کیا گیا ہے۔ ہمارے ہاں اس کی تاویل یہ ہے کہ اس سے وہ نوحہ مراد ہے جس کی زمانہ جاہلیت میں وصیت کی جاتی تھی اور وہ نوحہ زندگی میں مرنے والے کے حکم کی وجہ سے ان کی وصیت کے مطابق کیا جاتا تھا۔ پس اس وجہ سے ان کو عذاب دیا جاتا تھا۔ واللہ اعلم۔
تخریج : بخاری فی الجنائز باب ٣٤‘ مسلم فی الجنائز ٢٨‘ ترمذی فی الجنائز باب ٢٣‘ مسند احمد ٢؍٦١‘ ٤؍٢٥٢۔