٦٩١: نافع نے ابن عمر (رض) سے روایت کرتے ہیں کہ ایک شخص مہاجرین اولین میں سے مسجد میں اس وقت آئے جب عمر (رض) خطبہ دے رہے تھے ان کو عمر (رض) نے آواز دے کر کہا یہ آنے کا کیا وقت ہے ؟ تو انھوں نے کہا بس میں وضو کر کے مسجد آگیا ہوں عمر کہنے لگے صرف وضو ؟ جبکہ تمہیں معلوم ہے کہ ہمیں تو غسل کا حکم ملا تھا۔ یہ حضرت عائشہ صدیقہ (رض) ہیں جو اس بات کی اطلاع دے رہی ہیں کہ جناب رسول اللہ (صلی اللہ علیہ وآلہ وسلم) نے ان کو خاص سبب کی وجہ سے غسل کی ترغیب دی جس کی خبر حضرت ابن عباس (رض) دے رہے ہیں۔ آپ نے ان پر غسل کو لازم نہیں کیا تھا حضرت عائشہ صدیقہ (رض) بھی ان منجملہ روایت سے ہیں جن سے فصل اوّل میں روایت نقل کی گئی ہے کہ آپ جمعہ کے دن غسل کا حکم فرماتے اور حضرت عمر (رض) سے بھی یہ روایت وارد ہوئی ہے کہ یہ فرض کی جگہ نہ تھا۔ حضرت ابوجعفر طحاوی (رح) کہتے ہیں کہ ان آثار میں اور اعتبار سے وجوبِ غسل کی نفی ہے۔ ایک بات تو یہ ہے کہ حضرت عثمان (رض) نے غسل نہ فرمایا اور وضو پر اکتفاء کیا حالانکہ ان کو حضرت عمر (رض) نے یہ بھی کہا کہ جناب رسول اللہ (صلی اللہ علیہ وآلہ وسلم) ہمیں غسل کا حکم فرماتے تھے مگر حضرت عمر (رض) نے ان کو غسل کے لیے جناب رسول اللہ (صلی اللہ علیہ وآلہ وسلم) کے ارشاد کی وجہ سے واپسی کا حکم نہیں دیا ‘ اس میں اس بات کا ثبوت ہے کہ ان دونوں کے ہاں بھی یہ غسل وجوب کے لیے نہ تھا یہ ان اسباب کی بناء پر تھا جن کا تذکرہ حضرت ابن عباس (رض) ‘ حضرت عائشہ صدیقہ (رض) کے ارشادات میں گزرا یا ان کے علاوہ اسباب کی بناء پر۔ اگر یہ نہ ہوتا تو عثمان (رض) اسے کبھی نہ چھوڑتے جب حضرت عمر (رض) نے ان کو غسل کے لیے واپس لوٹنے کا حکم دینے کی بجائے خاموشی اختیار فرمائی اور یہ واقعہ اصحاب رسول (صلی اللہ علیہ وآلہ وسلم) کی موجودگی میں پیش آیا جو حضرت عمر (رض) کی طرح یہ بات خود سننے والے تھے اور اس کا مفہوم جاننے والے تھے جو حضرت عمر (رض) کا مقصود تھا اس لیے انھوں نے اس کو انوکھا نہیں سمجھا اور نہ اس کی مخالفت میں کسی بات کا حکم دیا تو اس سے وجوبِ غسل پر اجماعِ سکوتی منعقد ہوگیا اور جناب رسول اللہ (صلی اللہ علیہ وآلہ وسلم) سے بھی ارشاد مروی ہے جو اس معنی کا مؤید ہے کہ یہ غسل فضیلت کو پانے کے لیے مرضی پر موقوف تھا۔
تخریج : روایت ٦٨٥ کی تخریج ملاحظہ ہو۔
حاصل روایات :
ان ساتوں روایات سے معلوم ہوا کہ غسل کا حکم تو تھا مگر اس کے وجوب کا حکم نہ تھا اس کی دلیل یہ ہے معنی یہاں وجہ کے معنی دے رہا ہے۔
نمبر ١: حضرت عثمان (رض) نے غسل نہیں کیا بلکہ وضو پر اکتفاء کیا اور عمر (رض) نے ان کو یہ تو یاد دلایا کہ آپ (صلی اللہ علیہ وآلہ وسلم) ہمیں غسل کا حکم فرماتے تھے (مگر اس حکم سے وجوب ثابت نہیں ہوتا کیونکہ ثبوت وجوب کی صورت میں عمر (رض) ان کو واپس لوٹ جانے کا حکم فرماتے حالانکہ انھوں نے ان کو واپسی کا حکم نہیں دیا بلکہ وضو پر اکتفا کیا اگر امر وجوب کے لیے ہوتا تو وہ ان کو ضرور واپسی کا حکم فرماتے۔
نمبر ٢: اس سے یہ ثابت ہوا کہ ان دونوں کے ہاں امر وجوب کے لیے نہ تھا بلکہ اس کی وجہ وہ علت تھی جو روایت ابن عباس (رض) عائشہ (رض) میں بیان ہوچکی۔
نمبر ٣: اگر امر وجوب کے لیے ہو تو تو خود عثمان (رض) بھی اس کو ترک نہ کرتے اور وضو پر اکتفاء نہ کرتے جب عمر (رض) نے بھی ان کو یاد تو دلایا مگر غسل کے لیے لوٹنے کا نہیں کہا اور یہ باتیں صحابہ کرام کے مجمع کے سامنے ہوئیں جنہوں نے غسل جمعہ کی روایت آپ (صلی اللہ علیہ وآلہ وسلم) سے سنی تھی جیسا کہ عمر (رض) نے سنا تھا انھوں نے اس کی وہی وجہ سمجھی جو ان دونوں نے سمجھی ‘ انکار نہ کیا اور نہ اس کے خلاف کیا تو وجوب غسل جمعہ کی نفی پر اجماع سکوتی منعقد ہوگیا پس امر کو وجوب کے معنی میں لینا درست نہ ہوا۔
نمبر ٤: جناب رسول اللہ (صلی اللہ علیہ وآلہ وسلم) نے بطور اختیار اور فضیلت کے حصول کے لیے حکم فرمایا تھا اور اس کی دلیل احادیث میں واضح طور پر موجود ہے۔ پس یہ احادیث بھی نفی وجوب کے لیے کافی ثبوت ہیں۔