٦٩٦٤: ابو حسان کہتے ہیں کہ قبیلہ بنو عامر کے دو آدمی حضرت عائشہ (رض) کی خدمت میں آئے اور ان کو بتلایا کہ ابوہریرہ (رض) جناب نبی اکرم (صلی اللہ علیہ وآلہ وسلم) سے یہ بیان کر رہے ہیں کہ آپ نے فرمایا کہ عورت ‘ گھر اور گھوڑے میں نحوست ہے۔ (تو یہ سن کر) حضرت عائشہ (رض) سخت ناراض ہوئیں اور تیور بدل گئے اور فرمایا اس ذات کی قسم ہے جس نے حضرت محمد (صلی اللہ علیہ وآلہ وسلم) پر قرآن مجید کو اتارا ہے یہ کلمات جناب رسول اللہ (صلی اللہ علیہ وآلہ وسلم) نے بالکل نہیں فرمائے۔ بلکہ آپ نے فرمایا اہل جاہلیت ان تین چیزوں سے بدشگونی لیتے تھے۔ حضرت عائشہ (رض) نے بتلایا کہ یہ اہل جاہلیت کا قول ہے جو جناب رسول اللہ (صلی اللہ علیہ وآلہ وسلم) نے بطور حکایت نقل فرمایا۔ اس لیے نہیں کہ وہ آپ کے ہاں بھی اسی طرح ہے۔
تخریج : مسند احمد ٦‘ ١٥٠؍٢٤٠۔