٧٠٣٣: عباد بن تمیم کہتے ہیں کہ ابو بشر انصاری (رض) نے بتلایا کہ میں جناب رسول اللہ (صلی اللہ علیہ وآلہ وسلم) کے ساتھ ایک سفر میں تھا عبداللہ بن ابی بکر (رض) کہتے ہیں میرے خیال میں انھوں نے یہ لفظ کہے ” والناس فی بیتہم “ جبکہ لوگ اپنی خواب گاہوں میں تھے تو جناب رسول اللہ (صلی اللہ علیہ وآلہ وسلم) نے اپنے ایک منادی کو بھیج کر یہ اعلان کرایا کسی اونٹ کے گلے میں ہار یا تانت ہو اس کو کاٹ ڈالا جائے۔ امام مالک کہتے ہیں میرے خیال میں یہ نظر سے بچانے کی خاطر کیا گیا۔ امام طحاوی (رح) کہتے ہیں : ہمارے نزدیک اس سے مراد وہ قلائد ہیں جو مصائب کے اترنے سے پہلے ڈالے جاتے ہیں تاکہ وہ مصائب سے دور رہیں اور یہ بات غیر اللہ کے اختیار میں نہیں پس اس سے روکا گیا کیونکہ یہ شرک ہے باقی وہ تعویذات جو تکالیف کے اترنے کے لیے ڈالے جاتے ہیں ان میں کچھ حرج نہیں کیونکہ وہ علاج ہے۔ حضرت عائشہ (رض) سے بعینہٖ یہ بات روایت میں وارد ہے (ملاحظہ ہو)
تخریج : بخاری فی الجہاد باب ١٣٩‘ مسلم فی اللباس ١٠٥‘ ابو داؤد فی الجہاد باب ٤٥‘ مالک فی صفۃ النی ٣٩‘ مسند احمد ٥؍٢١٦۔