٧٠٦٦: نبہان مولیٰ ام سلمہ نے حضرت ام سلمہ (رض) سے روایت کی کہ نبی اکرم (صلی اللہ علیہ وآلہ وسلم) نے فرمایا جب تم میں سے کسی ایک کا مکاتب ہو اور وہ ادائیگی کے لیے مال رکھتا ہو مالکہ کو اس سے پردہ کرنا چاہیے۔ سفیان کہتے ہیں کہ میں نے یہ روایت زہری سے سنی ہے اور معمر نے اس کی تصدیق فرمائی۔ امام جعفر طحاوی (رح) کہتے ہیں اہل مدینہ میں سے ایک جماعت اس طرف گئی ہے کہ غلام کے لیے کوئی حرج نہیں کہ وہ اپنی مالکہ کے بال چہرہ اور جن اعضاء کو محرم دیکھ سکتا ہے ان کے دیکھنے میں بھی حرج نہیں انھوں نے اس روایت کو دلیل بنایا کہ اس میں رسول اللہ (صلی اللہ علیہ وآلہ وسلم) نے حضرت ام سلمہ کو فرمایا فلتحتجب منہ کہ اب اسے پردہ کرنا چاہیے یہ اس بات کی دلیل ہے کہ پہلے اسے پردے کی ضرورت نہ تھی اور اس سلسلے میں حضرت عبداللہ بن عباس (رض) کی روایت اور ازواج مطہرات کا عمل بھی دلیل کے طور پر پیش کیا جاتا ہے۔ روایت یہ ہے۔
تخریج : ابو داؤد فی الاعتاق باب ١‘ ترمذی فی البیوع باب ٣٥‘ ابن ماجہ فی العتق باب ٣‘ مسند احمد ٦؍٢٨٩۔
خلاصہ الزام :
اہل مدینہ کی ایک جماعت کا کہنا یہ ہے کہ وہ اپنی مالکہ کے بال ‘ چہرہ اور وہ اعضا جن کو محرم دیکھ سکتا ہے ان کو دیکھنے میں کوئی حرج نہیں۔
فریق ثانی : کوئی غلام آزاد عورت کے اعضاء نہیں دیکھ سکتا سوائے ان حصوں کے جن کو آزاد غیر محرم دیکھ سکتا ہے۔ اس قول کو ائمہ احناف نے اختیار کیا ہے۔