٧٣٧: ابو اسحاق کہتے ہیں کہ میں اسود بن یزید کے ہاں آیا وہ میرے بھائی اور دوست تھے میں نے ان سے کہا اے ابو عمرو ! مجھے وہ روایت سناؤ جو تمہیں عائشہ صدیقہ ام المؤمنین (رض) نے سنائی جو جناب رسول اللہ (صلی اللہ علیہ وآلہ وسلم) کی نماز سے متعلق ہے تو وہ کہنے لگے کہ عائشہ (رض) کہتی ہیں کہ جناب رسول اللہ (صلی اللہ علیہ وآلہ وسلم) رات کے پہلے حصہ میں سو رہتے اور پچھلے میں جاگتے پھر اگر آپ کو گھر والوں سے حاجت ہوتی تو وہ پوری کرتے پھر پانی چھونے سے پہلے سو رہتے جب اذان تہجد کا وقت ہوتا تو اچھل کر اٹھ بیٹھتے (حضرت عائشہ نے وثب کا لفظ فرمایا قام نہیں فرمایا) پھر اپنے اوپر پانی بہاتے اور انھوں نے اغتسل کا لفظ نہیں فرمایا میں ان کی مراد کو جانتا ہوں اگر حالت جنابت ہوتی تو وضو کرتے جیسا کہ نماز کا وضو کیا جاتا ہے۔ یہ اسود بن یزید ہے جس کی روایت کو ہم نے تفصیل سے نقل کیا ہے کہ جب آپ نیند کا ارادہ فرماتے اور حالت جنابت میں ہوتے تو نماز والا وضو فرما لیتے۔ رہا ان کا یہ قول ” فان کانت لہ حاجۃ “ کہ اگر آپ کو اپنے اہل سے حاجت ہوتی تو اسے پورا فرماتے اور پانی کو چھونے سے پہلے سو جاتے ‘ اس میں احتمال یہ ہے کہ اس سے مراد پانی کی وہ مقدار ہے جس سے غسل کیا جاتا ہے نہ کہ وضو والا پانی اور یہ بات ابو اسحق کے علاوہ روایت حضرت عائشہ صدیقہ (رض) سے نقل کی ہے کہ جناب رسول اللہ (صلی اللہ علیہ وآلہ وسلم) نے نماز والا وضو کرتے۔ روایات ملاحظہ ہوں۔
تخریج : بیہقی فی السنن الکبرٰی ١؍٢٠١؍٢٠٢‘ مسند احمد ٦؍١٠٢۔
اب اس تفصیلی روایت سے ثابت ہوا کہ جنابت کی حالت میں سونے سے قبل نماز والا وضو فرماتے پس تفصیلی روایت کے مطابق اجمالی مطلب لیا جائے گا۔
جواب نمبر ٢: کہ حاجت کے بعد آپ پانی چھونے سے پہلے سو رہتے اس سے مراد پانی کی وہ مقدار ہے جس سے غسل کیا جائے نہ کہ وضو والا پانی اور یہ بات بھی ہم ابو اسحاق کے علاوہ روات کی روایات سے ثابت کرتے ہیں پس فریق اوّل کو اس سے بھی استدلال کا کوئی موقعہ نہیں ہے۔