٩٧٦: ابوالزبیر کہتے ہیں کہ میں نے جابر (رض) سے پوچھا کہ کیا جناب رسول اللہ (صلی اللہ علیہ وآلہ وسلم) نے یہ فرمایا کہ اگر یہ چیز نہ ہوتی تو میں ایک آدمی کو کہتا کہ وہ لوگوں کو نماز پڑھائے پھر گھروں کو سب چیزوں سمیت جلا ڈالتا۔ حضرت جابر (رض) کہتے ہیں کہ یہ بات آپ (صلی اللہ علیہ وآلہ وسلم) نے ایک آدمی کو فرمائی جس کے متعلق کوئی بات پہنچی تو فرمایا اگر وہ باز نہ آیا تو میں اس کا گھر ہر چیز سمیت جلا دوں گا۔ یہ جابر (رض) خبر دے رہے ہیں یہ کسی ایسی چیز سے پیچھے رہ جانے کی وجہ سے تھا جس سے تخلف درست نہیں اور دھمکی اس سے متعلق ہے۔ یہ جابر (رض) بتلا رہے ہیں کہ جناب رسول اللہ (صلی اللہ علیہ وآلہ وسلم) کا یہ ارشاد اس شخص سے متعلق تھا جو ایسی چیزوں سے جان بوجھ کر پیچھے رہنے والے تھے جس سے پیچھے رہنا درست نہیں۔ ان روایات اور ان سے پہلے مذکورہ روایات میں کوئی بھی نماز وسطیٰ کی حقیقت میں نشاندہی نہیں کرتی جب زید بن ثابت (رض) کے قول میں کوئی دلیل نہ ملی تو ابن عمر (رض) کی روایت کی طرف رجوع کیا۔ اس میں ابن عمر (رض) کی اپنی رائے تو مذکور ہے جناب رسول اللہ (صلی اللہ علیہ وآلہ وسلم) سے ایسی کوئی چیز بیان نہیں کی گئی۔ خود ان کا قول یہ ہے کہ یہ وہ نماز ہے کہ جس میں جناب رسول اللہ (صلی اللہ علیہ وآلہ وسلم) نے کعبہ کی طرف رخ فرمایا اور دوسری سند سے ان سے اختلاف کی اور صورت منقول ہے۔
حاصل یہ ہے :
کہ اس روایت میں اور اس سے پہلے گزشتہ روایات میں صلوۃ وسطیٰ کے متعلق کوئی دلیل نہیں کہ وہ کون سی نماز ہے جب اس بات کی نفی ہوگئی کہ زید بن ثابت (رض) سے جو روایات وارد ہوئی ہیں ان میں سے کسی میں بھی دلیل نہیں کہ صلوۃ وسطیٰ ظہر یا جمعہ یا فلاں نماز ہے۔
الجواب : اب رہی روایت ابن عمر (رض) تو اس میں جناب رسول اللہ (صلی اللہ علیہ وآلہ وسلم) کا قول موجود نہیں بلکہ وہ ابن عمر (رض) کا قول ہے کیونکہ اس میں انھوں نے فرمایا : ” ہی الصلاۃ التی وجہ فیہا رسول اللہ (صلی اللہ علیہ وآلہ وسلم) الی الکعبۃ “ پس نماز ظہر کے وسطیٰ ہونے کی دلیل نہ بن سکی۔
جواب نمبر ٢: صلوۃ وسطیٰ کے سلسلہ میں ان کی دوسری روایت موجود ہے جس میں نماز عصر کو صلوۃ وسطیٰ کہا گیا ہے پس ان سے متضاد روایات اس بات کا ثبوت ہے کہ صلوۃ وسطیٰ کے متعلق ان کے پاس جناب رسول اللہ (صلی اللہ علیہ وآلہ وسلم) کا کوئی قول نہ تھا وہ ان کی رائے تھی جو دوسرے صحابہ کی رائے کے خلاف ہونے کی وجہ سے حجت نہ بنی۔