Jamiat Tirmidhi: Hadith 265

ابومسعود عقبہ بن عمرو انصاری بدری (رض) کہتے ہیں کہ رسول اللہ ﷺ نے فرمایا : اس شخص کی نماز کافی نہ ہوگی جو رکوع اور سجدے میں اپنی پیٹھ سیدھی نہ رکھے ١ ؎۔ امام ترمذی کہتے ہیں : ١- ابومسعود انصاری کی حدیث حسن صحیح ہے، ٢- اس باب میں علی بن شیبان، انس، ابوہریرہ اور رفاعہ زرقی (رض) سے بھی احادیث آئی ہیں، ٣- صحابہ کرام اور ان کے بعد کے لوگوں میں سے اہل علم کا اسی پر عمل ہے کہ آدمی رکوع اور سجدے میں اپنی پیٹھ سیدھی رکھے، ٤- شافعی، احمد، اور اسحاق بن راہویہ کہتے ہیں کہ جس نے رکوع اور سجدے میں اپنی پیٹھ سیدھی نہیں رکھی تو اس کی نماز فاسد ہے، اس لیے کہ نبی اکرم ﷺ کی حدیث ہے : اس شخص کی نماز کافی نہ ہوگی جو رکوع اور سجدے میں اپنی پیٹھ سیدھی نہ رکھے۔ تخریج دارالدعوہ : سنن ابی داود/ الصلاة ١٤٨ (٨٥٥) ، سنن النسائی/الافتتاح ٨٨ (١٠٢٨) ، والتطبیق ٥٤ (١١١٠) ، سنن ابن ماجہ/الإقامة ١٦ (٨٧٠) ، ( تحفة الأشراف : ٩٩٩٥) ، مسند احمد (٤/١٩٩، ١٢٢) ، سنن الدارمی/الصلاة ٧٨ (١٣٦٠) (صحیح) وضاحت : ١ ؎ : اس سے معلوم ہوا کہ نماز میں طمانینت اور تعدیل ارکان واجب ہے ، اور جو لوگ اس کے وجوب کے قائل نہیں ہیں وہ کہتے ہیں اس سے نص پر زیادتی لازم آئے گی اس لیے کہ قرآن مجید میں مطلق سجدہ کا حکم ہے اس میں طمانینت داخل نہیں یہ زیادتی جائز نہیں ، اس کا جواب یہ دیا جاتا ہے کہ یہ زیادتی نہیں بلکہ سجدہ کے معنی کی وضاحت ہے کہ اس سے مراد سجدہ لغوی نہیں بلکہ سجدہ شرعی ہے جس کے مفہوم میں طمانینت بھی داخل ہے۔ قال الشيخ الألباني : صحيح، ابن ماجة (870) صحيح وضعيف سنن الترمذي الألباني : حديث نمبر 265