معمر بن عبداللہ بن نضلہ (رض) کہتے ہیں کہ میں نے رسول اللہ ﷺ کو فرماتے سنا : گنہگار ہی احتکار (ذخیرہ اندوزی) کرتا ہے ١ ؎۔ محمد بن ابراہیم کہتے ہیں : میں نے سعید بن المسیب سے کہا : ابو محمد ! آپ تو ذخیرہ اندوزی کرتے ہیں ؟ انہوں نے کہا : معمر بھی ذخیرہ اندوزی کرتے تھے۔ امام ترمذی کہتے ہیں : ١ - معمر کی حدیث حسن صحیح ہے، ٢ - سعید بن مسیب سے مروی ہے، وہ تیل، گیہوں اور اسی طرح کی چیزوں کی ذخیرہ اندوزی کرتے تھے، ٣ - اس باب میں عمر، علی، ابوامامہ، اور ابن عمر (رض) سے بھی احادیث آئی ہیں، ٤ - اہل علم کا اسی پر عمل ہے۔ ان لوگوں نے کھانے کی ذخیرہ اندوزی ناجائز کہا ہے، ٥ - بعض اہل علم نے کھانے کے علاوہ دیگر اشیاء کی ذخیرہ اندوزی کی اجازت دی ہے، ٦ - ابن مبارک کہتے ہیں : روئی، دباغت دی ہوئی بکری کی کھال، اور اسی طرح کی چیزوں کی ذخیرہ اندوزی میں کوئی حرج نہیں ہے۔ تخریج دارالدعوہ : صحیح مسلم/المساقاة ٢٦ (البیوع ٤٧) ، (١٦٠٥) ، سنن ابی داود/ البیوع ٤٩ (٣٤٤٧) ، سنن ابن ماجہ/التجارات ٦ (٢١٥٤) ، (تحفة الأشراف : ١١٤٨١) ، و مسند احمد (٦/٤٠٠) وسنن الدارمی/البیوع ١٢ (٢٥٨٥) (صحیح ) وضاحت : ١ ؎ : «احتکار» : ذخیرہ اندوزی کو کہتے ہیں ، یہ اس وقت منع ہے جب لوگوں کو غلے کی ضرورت ہو تو مزید مہنگائی کے انتظار میں اسے بازار میں نہ لایا جائے ، اگر بازار میں غلہ دستیاب ہے تو ذخیرہ اندوزی منع نہیں۔ کھانے کے سوا دیگر غیر ضروری اشیاء کی ذخیرہ اندوزی میں کوئی حرج نہیں۔ قال الشيخ الألباني : صحيح، ابن ماجة (2154) صحيح وضعيف سنن الترمذي الألباني : حديث نمبر 1267