ابوہریرہ (رض) کہتے ہیں کہ فاطمہ (رض) نے ابوبکر (رض) کے پاس آ کر کہا : آپ کی وفات کے بعد آپ کا وارث کون ہوگا ؟ انہوں نے کہا : میرے گھر والے اور میری اولاد، فاطمہ (رض) نے کہا : پھر کیا وجہ ہے کہ میں اپنے باپ کی وارث نہ بنوں ؟ ابوبکر (رض) نے کہا : میں نے رسول اللہ ﷺ کو فرماتے سنا ہے کہ ہم (انبیاء) کا کوئی وارث نہیں ہوتا (پھر ابوبکر (رض) نے کہا) لیکن رسول اللہ ﷺ جس کی کفالت کرتے تھے ہم بھی اس کی کفالت کریں گے اور آپ ﷺ جس پر خرچ کرتے تھے ہم بھی اس پر خرچ کریں گے۔ امام ترمذی کہتے ہیں : ١ - ابوہریرہ (رض) کی حدیث اس سند سے حسن غریب ہے، ٢ - اسے حماد بن سلمہ اور عبدالوہاب بن عطاء نے مسنداً روایت کیا ہے یہ دونوں اور محمد بن عمر سے اور محمد ابوسلمہ سے، اور ابوسلمہ ابوہریرہ (رض) سے روایت کرتے ہیں، میں نے محمد بن اسماعیل بخاری سے اس حدیث کے بارے میں پوچھا تو انہوں کہا : میں حماد بن سلمہ کے علاوہ کسی کو نہیں جانتا ہوں جس نے اس حدیث کو محمد بن عمرو سے محمد نے ابوسلمہ سے اور ابوسلمہ نے ابوہریرہ سے (مرفوعاً ) روایت کی ہو۔ (ترمذی کہتے ہیں : ہاں) عبدالوہاب بن عطاء نے بھی محمد بن عمرو سے اور محمد نے ابوسلمہ سے اور ابوسلمہ نے ابوہریرہ سے حماد بن سلمہ کی روایت کی طرح روایت کی ہے، ٣ - اس باب میں عمر، طلحہ، زبیر، عبدالرحمٰن بن عوف، سعد اور عائشہ (رض) سے بھی احادیث آئی ہیں۔ تخریج دارالدعوہ : تفرد بہ المؤلف، (تحفة الأشراف : ٦٦٢٥) وانظر : صحیح البخاری/الخمس ١ (٣٠٩٢، ٣٠٩٣) ، والنفقات ٣ (٦٧٢٥ و ٦٧٢٦) (صحیح ) قال الشيخ الألباني : صحيح مختصر الشمائل المحمدية (337) صحيح وضعيف سنن الترمذي الألباني : حديث نمبر 1608