زیاد بن حارث صدائی (رض) کہتے ہیں کہ رسول اللہ ﷺ نے مجھے فجر کی اذان دینے کا حکم دیا تو میں نے اذان دی، پھر بلال (رض) نے اقامت کہنی چاہی تو رسول اللہ ﷺ نے فرمایا : قبیلہ صداء کے ایک شخص نے اذان دی ہے اور جس نے اذان دی ہے وہی اقامت کہے گا ۔ امام ترمذی کہتے ہیں : ١- اس باب میں ابن عمر (رض) سے بھی روایت ہے، ٢- زیاد (رض) کی روایت کو ہم صرف افریقی کی سند سے جانتے ہیں اور افریقی محدثین کے نزدیک ضعیف ہیں۔ یحییٰ بن سعید قطان وغیرہ نے ان کی تضعیف کی ہے۔ احمد کہتے ہیں : میں افریقی کی حدیث نہیں لکھتا، لیکن میں نے محمد بن اسماعیل کو دیکھا وہ ان کے معاملے کو قوی قرار دے رہے تھے اور کہہ رہے تھے کہ یہ مقارب الحدیث ہیں، ٣- اکثر اہل علم کا اسی پر عمل ہے کہ جو اذان دے وہی اقامت کہے۔ تخریج دارالدعوہ : سنن ابی داود/ الصلاة ٣٠ (٥١٤) سنن ابن ماجہ/الأذان ٣ (٧١٧) (تحفة الأشراف : ٣٦٥٣) مسند احمد (٤/١٦٩) (ضعیف) (سند میں عبدالرحمن بن انعم افریقی ضعیف ہیں) وضاحت : ١ ؎ : یہ حدیث ضعیف ہے ، اس لیے اس کی بنا پر مساجد میں جھگڑے مناسب نہیں ، اگر صحیح بھی ہو تو زیادہ سے زیادہ مستحب کہہ سکتے ہیں ، اور مستحب کے لیے مسلمانوں میں جھگڑے زیبا نہیں۔ قال الشيخ الألباني : ضعيف، ابن ماجة (717) // ضعيف سنن ابن ماجة (152) ، ضعيف أبي داود (102 / 514) ، الإرواء (237) ، المشکاة (648) ، الضعيفة (35) ، ضعيف الجامع الصغير (1377) // صحيح وضعيف سنن الترمذي الألباني : حديث نمبر 199