انس بن مالک (رض) کہتے ہیں کہ رسول اللہ ﷺ نے فرمایا : جس نے اللہ کی رضا کے لیے چالیس دن تک تکبیر اولیٰ کے ساتھ باجماعت نماز پڑھی تو اس کے لیے دو قسم کی برات لکھی جائے گی : ایک آگ سے برات، دوسری نفاق سے برات ۔ امام ترمذی کہتے ہیں : انس سے یہ حدیث موقوفاً بھی روایت کی گئی ہے، اور ہم نہیں جانتے کہ ابوقتیبہ سلمہ بن قتیبہ کے سوا کسی نے اسے مرفوع روایت کیا ہو یہ حدیث حبیب بن ابی حبیب بجلی سے بھی روایت کی جاتی ہے انہوں نے اسے انس بن مالک سے روایت کیا ہے اور اسے انس ہی کا قول قرار دیا ہے، اسے مرفوع نہیں کیا، نیز اسماعیل بن عیاش نے یہ حدیث بطریق «عمارة بن غزية عن أنس بن مالک عن عمر بن الخطاب عن النبي صلی اللہ عليه وسلم» اسی طرح روایت کی ہے، اور یہ حدیث غیر محفوظ اور مرسل ١ ؎ ہے، عمارہ بن غزیہ نے انس بن مالک کا زمانہ نہیں پایا۔ تخریج دارالدعوہ : تفرد بہ المؤلف ( تحفة الأشراف : ٥٢١) (حسن) (الصحیحة ٢٥٦٢، و ١٩٧٩، وتراجع الألبانی ٤٥٠) وضاحت : ١ ؎ : مرسل یہاں منقطع کے معنی میں ہے۔ قال الشيخ الألباني : حسن، التعليق الرغيب (1 / 151) ، الصحيحة (2652) صحيح وضعيف سنن الترمذي الألباني : حديث نمبر 241